Трамп изјави дека ќе се сретне со Путин „многу брзо“ по преземањето на функцијата.
Доналд Трамп, новоизбраниот претседател на САД, соопшти дека планира средба со рускиот претседател Владимир Путин „многу скоро“ по преземањето на функцијата следната недела.
Според Ројтерс, Трамп не прецизираше датум за средбата, која би била прва меѓу лидерите на САД и Русија од почетокот на војната што Путин ја започна против Украина во февруари 2022 година.
За време на гостувањето на телевизијата „Њузмакс“, Трамп беше запрашан за неговата стратегија за ставање крај на војната во Украина.
– Па, постои само една стратегија и таа зависи од Путин. Не би рекол дека тој е премногу задоволен од развојот на ситуацијата, бидејќи и нему не му оди баш најдобро. Знам дека сака да се сретне со мене, а и јас ќе се сретнам со него наскоро. Ќе го направев тоа порано, но прво мора да ја преземам власта и да влезем во кабинетот. Некои работи бараат да бидеш на своето место – изјави Трамп.
Британската агенција потсетува на изјавата на американскиот конгресмен Мајк Волц, кој ќе биде советник за национална безбедност во Белата куќа. Тој во неделата истакна дека очекува телефонски разговор меѓу Трамп и Путин во „следните денови и недели“.
Ројтерс известува дека руската инвазија на Украина предизвика десетици илјади жртви, милиони раселени лица и го продлабочи најтешкиот раздор меѓу Москва и Западот од Кубанската ракетна криза во 1962 година.
