Бајден го додели Медалот на слободата! Меѓу победниците се Меси и Боно, Маск го исмеваше Сорос

Американскиот претседател во заминување Џо Бајден во неделата го додели „Претседателскиот медал на слободата“, највисокото и најпрестижното цивилно признание доделено од претседателот на Соединетите Американски Држави. "DW" пишува дека 19 познати личности ја добиле наградата во Белата куќа.

„За последен пат како претседател ја имам честа да го доделам Медалот на слободата, највисоката цивилна награда на нашата нација, на група извонредни, навистина извонредни луѓе, кои со своите напори ја обликуваа американската култура“, рече Бајден.

Наградата им ја додели на поранешната државна секретарка Хилари Клинтон и на демократскиот милијардер, филантропот Џорџ Сорос, а истата ја прими неговиот син Алекс Сорос.

Наградата ја добија и модната икона Ана Винтур, актерите Дензел Вашингтон и Мајкл Џеј Фокс и фронтменот на рок групата У2, Боно.

Бајден, исто така, му оддаде почит на Меџик Џонсон, кој ги предводеше Лос Анџелес Лејкерс до пет шампионски титули, и фудбалската суперѕвезда Лионел Меси, кој отсуствуваше на церемонијата поради однапред договорени обврски.

Останатите добитници беа модниот дизајнер Ралф Лорен, шпанско-американскиот готвач и филантроп Хозе Андрес и Џејн Гудал.

Беа доделени и неколку постхумни медали, па така одликување доби Роберт Кенеди, татко на сојузникот на Трамп, Роберт Ф. Кенеди Џуниор.

„Медалот се доделува на поединци кои дале исклучителен придонес за просперитетот, вредностите или безбедноста на САД, светскиот мир или други значајни општествени, јавни или приватни потфати, се вели во соопштението на Белата куќа.

Илон Маск се огласи на својот профил на "X" за церемонијата. Тој објави слика во која Бајден му доделува награда на антагонистот на „Војна на ѕвездите“, Лорд Сит.

„Џорџ Сорос овде изгледа добро. Мора да е до осветлувањето“, напиша Маск.