По застојот во авиосообраќајот и проблемите во банките, Клејтон предупредува на можни нови прекини во САД

Точка

22/11/2026

22:19

361

Големина на фонт

а а а

Американците може повторно да се соочат со прекини во услугите додека компаниите и државните агенции ги заменуваат застарените компјутерски системи, предупреди во неделата директорот на националното разузнавање на САД, Џеј Клејтон.

Во емисијата „State of the Union“ на Си-ен-ен, Џеј Клејтон рече дека и самото преминување на понови системи ќе носи технички тешкотии. Надградбите, според него, се потребни и за услугите да работат подобро и за да бидат позаштитени од сајбернапади.

Предупредувањето доаѓа по месец во кој технички проблеми ги почувствуваа и патниците и клиентите на неколку големи банки. Како што потсетува Ројтерс, во САД привремено беше запрен авиосообраќајот на национално ниво. Во одделен инцидент беа погодени услугите за електронска пошта на „Мајкрософт“.

Архивски службен портрет на Џеј Клејтон

Џеј Клејтон на архивски службен портрет. Фото: Американска комисија за хартии од вредност

Прекин месецов имаше и во мрежата на американската Агенција за национална безбедност. Во интервју за Еј-би-си, Клејтон ги припиша досегашните прекини на техничките надградби и ја отфрли претпоставката за координиран напад или операција поддржана од држава.

За одделните извештаи за сајбернапади врз ФБИ и Министерството за земјоделство, Клејтон одби да изнесе детали. Рече дека очекува одговори од истражителите.