Вардар го совлада Алкалоид со 36:31 во скопското дерби од десеттото коло на ракометната Суперлига, одиграно на 14 ноември во СЦ „Борис Трајковски“. „Црвено-црните“ останаа со максимален учинок: десет победи во десет натпревари.

Матео Фадуил постигна 11 гола за победникот. Вукашин Воркапиќ додаде шест, а кај Алкалоид најефикасни беа Никола Костески со осум и Марко Митев со седум погодоци, според официјалниот извештај на гостинскиот клуб.

Рамноправно до средината на вториот дел

Вардар отвори со 3:0, но Алкалоид се врати и во 19. минута израмни на 12:12. На пауза резултатот беше 17:17, а неизвесноста продолжи и по одморот.

Иван Чупиќ на претходна прес-конференција на Вардар. Архивска фотографија. Фото: Дерби / архива на Точка

Алкалоид поведе со 22:21 во 38. минута и неколкупати ја преземаше предноста. Последното израмнување беше 26:26 во 44. минута, пред периодот што го одреди победникот.

Серијата 6:0 го реши дербито

Во следните пет минути Вардар направи серија од шест гола без одговор и поведе со 32:26. Алкалоид не успеа да ја надомести таа разлика, а домаќинот ја задржа контролата до конечните 36:31.

Со победата Вардар стигна до 20 бода, додека Алкалоид остана на 16. За гостите следуваат нови силни предизвици: првенствен дуел со Еурофарм Пелистер и соочување со словенечки Горење Велење во ЕХФ Европскиот куп, наведува клубот во својот извештај.