Тинејџер, кој шест дена се водеше како исчезнат во суров и тешко пристапен предел во австралиската држава Викторија, е пронајден жив. Спасувачите денес го извлекоа на безбедно, а неговото семејство изјави дека тој не е повреден.

Вилијам – чие презиме не е објавено – исчезна минатиот петок додека бил на кампување со пријател во државата Викторија, на околу 180 километри источно од Мелбурн.

Тој се упатил назад кон местото каде што мајка му го оставила, со намера да земе дополнителна опрема за кампување, но никогаш не се вратил.

Според полицијата, на тинејџерите им било топло, па Вилијам ја соблекол маицата. Очекувал дека кратката прошетка ќе трае околу 20 минути, но на крајот исчезнал, облечен само во шорцеви и чизми. Бидејќи немал искуство со кампување, имал потешкотии со снаоѓањето на непознатиот терен.

Потрагата се одвивала во услови кога во блиските планински предели паѓал снег, а температурите паѓале под нулата. Во операцијата за пронаоѓање биле вклучени полициски кучиња, нуркачи и хеликоптери.

Откако го пронашле, спасувачите го извлекле на безбедно и му дале крофна и шише вода. Потоа, тој бил пренесен во болница на лекарски преглед.

„Никогаш повеќе нема да излезе од дома“

Неговата мајка, Елизабет Баркли, им изјавила на новинарите дека тој имал „само неколку гребаници“ и дека изгледал како да е во добра здравствена состојба и во добра форма.

„Добро е; сè изгледа дека е во ред. Тој е целосно здрав“, рекла таа. „Останал на едно место и чекал да биде спасен. Пресреќна сум што е жив“, додала таа.

Низ шега прокоментирала: „Никогаш повеќе нема да излезе од дома“.

Од полицијата изјавија дека полициските службеници биле длабоко трогнати што го пронашле тинејџерот жив.

„Тоа не се случува секојпат“, изјави Џејсон Бенбоу, вршител на должноста инспектор во полицијата на Викторија. Тој додаде дека се надева оти Вилијам наскоро ќе им раскаже што се случило.