Регулаторното тело соопшти дека лековите за слабеење и дијабетес се поврзани со неартеритична предна исхемична оптичка невропатија (НАИОН), состојба која може да предизвика ненадејно и трајно губење на видот. Оваа одлука го засилува надзорот врз безбедноста на оваа сè попопуларна група лекови, пишува „Јуроњуз“.

Новите барања се однесуваат на сите агонисти на ГЛП-1 рецепторите, кои масовно се користат во лекувањето на дијабетес тип 2 и дебелина.

Меѓу нив се и исклучително популарните препарати како „Оземпик“ и „Вегови“ на компанијата „Ново Нордиск“, како и „Мунџаро“ и „Зепбаунд“ на компанијата „Ели Лили“, но и други лекови од истата категорија.

Одлука заснована на обемна анализа

Проценката на Американската агенција за храна и лекови (ФДА) се темели на анализа на 126 клинички испитувања, во кои биле опфатени повеќе од 134.000 пациенти. Дополнително, агенцијата ги проучила податоците собрани од реалната примена на лековите, како и објавените опсервациски студии.

Иако од ФДА признале дека постојат ограничувања во достапните докази, заклучиле дека потенцијалниот ризик го оправдува воведувањето дополнителни предупредувања за целата група лекови.

Европската агенција за лекови (ЕМА) уште минатата година заклучила дека НАИОН треба да се класифицира како многу ретка несакана реакција на семаглутидот, активната состојка во некои од овие лекови.

Според нивната проценка, оваа несакана реакција може да се појави кај најмногу еден од 10.000 пациенти.