Главниот град на Босна и Херцеговина, Сараево, повторно е меѓу петте градови со највисоко загадување на воздухот во светот. Причините за ова се комплексни, вклучувајќи слаба циркулација на воздухот во зимскиот период, голема концентрација на штетни честички PM2.5, стари автомобили и употреба на цврсто гориво со слаб квалитет.
Главниот град на Босна и Херцеговина денес се најде меѓу петте градови со најголемо загадување на воздухот во светот, според податоците објавени на швајцарската веб-страница „AirQuality“, која собира и анализира информации од мерните станици во урбаните центри низ речиси сите земји.
На врвот на листата е Лахор, Пакистан, каде што квалитетот на воздухот падна во таканаречената „виолетова зона“ – што укажува на опасен воздух со индекс на загадување помал од 300. Во меѓувреме, Сараево беше означено во „црвената зона“ за нездрав воздух, со индекс од 167, што го става на второто место на листата.
Во Сараево, слабата циркулација на воздухот во текот на зимата е еден од факторите, но не е и единствената причина.
Главниот извор на загадување се ситните честички познати како PM2.5, кои можат длабоко да навлезат во респираторниот систем и да доведат до сериозни здравствени компликации.
Вчера, концентрацијата на овие честички во Сараево достигна 112 микрограми на кубен метар – ниво што се категоризира како „многу загаден“ воздух. Покрај фактот што градот се наоѓа во котлина каде што во зима има слабо струење на воздухот, за загадувањето во Сараево придонесуваат и големиот број стари автомобили на улиците, како и повеќе од 43.000 регистрирани ложишта на цврсто гориво, кои често се со слаб квалитет и при согорувањето испуштаат значителни количества штетни материи.
