„The Hollywood Reporter“ ги замолил стилистите на познатите личности да изберат по десет омилени модни изданија од црвениот тепих за оваа година. Листата е составена според бројот на гласови, а во случај на изедначен број гласови одлучувал пласманот на листите на стилистите. За листата да не биде еднолична, вклучено е само по едно модно издание од секоја личност, иако, како што наведува магазинот, Зендаја можела да има три или повеќе позиции.

Најмногу симпатии кај стилистите освоил младиот дизајнерски тандем што стои зад модната куќа „Matières Fécales“, Хана Роуз Далтон и Стивен Рај Баскаран. Меѓу омилените дизајнери се и „Chanel“, под раководство на Матје Блази, „Dior“ на Џонатан Андерсон и „Saint Laurent“ на Ентони Вакарело.

Зендаја како божицата Атина

Зендаја на њујоршката премиера на филмот „The Odyssey“, на 14 јули, носела фустан „Ange“ од модната куќа „Matières Fécales“, изработен од ситно набран шифон, со крилја од бели пердуви на петел.

Фустанот, кој го избрал нејзиниот стилист Ло Роуч, алудира на нејзината улога на грчката божица Атина. Стилистката Иларија Урбинати изјавила дека модното издание не изгледало како костим, туку како уметничка слика.

Второто место ѝ припадна на инфлуенсерката Ема Чембрлејн, која на Мет галата на 4 мај носеше уникатен фустан на „Mugler“ во бои на виножитото, инспириран од импресионистите. Сликањето на фустанот траело 40 часа, а неговото сушење четири дена.

Третото место ѝ припадна на актерката Чејс Инфинити, во фустан на „Thom Browne“ од Мет галата, со 1,5 милиони рачно извезени светкави детали и свилени реси во повеќе од 600 нијанси, инспириран од скулптурата на Милоска Венера.

Четвртото место го зазеде Тејана Тејлор, исто така во креација на „Thom Browne“, на доделувањето на наградите „Actor Awards“ на 1 март, а петта е Никол Кидман во фустан на „Chanel“, украсен со мониста во боја на рубин и пердуви, од Мет галата.

На шестото место е Дејзи Едгар-Џонс во фустан со корсет на модната куќа „Miu Miu“, од премиерата на филмот „Sense and Sensibility“ во Сиднеј, а седма е Чарли XCX. Пејачката на доделувањето на наградите „MTV VMA“ на 27 септември носела креација на „Saint Laurent“, изработена по мерка, со откриен стомак, која „THR“ ја опишува како спој на готика и гламур во стилот на модерната Мортиша Адамс. Стилистот Мајкл Фишер изјавил дека не познава никого што е посвесен за себе од Чарли XCX.

Ријана е осма со креацијата на „Maison Margiela“ од Мет галата, на која парискиот кројачки оддел работел 1.380 часа. Првите десет ги заокружуваат Бела Хадид во чипкан фустан на „Schiaparelli“ од Кан, посветен на Џејн Биркин, и Шарлиз Терон во машки костум на „Dior“ на премиерата на филмот „Apex“.

Од Марго Роби до Флоренс Пју

На листата се и Пол Ентони Кели, Тилда Свинтон, Џејкоб Елорди, Троје Сиван, Фарел Вилијамс, Зои Кравиц, Џена Ортега, Марго Роби и Лејди Гага, која на доделувањето на наградите „Grammy“ носеше црн фустан од пердуви на модната куќа „Matières Fécales“. Дуа Липа е на дваесеттото место со бел костум на „Schiaparelli“ и шапка со широк обод, кои ги носела на свадбата со Калум Тарнер во Лондон на 31 мај.

Следуваат Педро Паскал и Шабузи со модните изданија од доделувањето на Оскарите, Џенифер Лоренс и Кери Расел, кои го делат 23-то место, како и Деми Мур, Мајкл Б. Џордан и Ренате Реинсве, кои го делат 24-то место. Листата ја затвораат Џон Малкович во костум на „Dior“ од Венеција и Флоренс Пју во фустан на „Vivienne Westwood“ во боја на лимета, од њујоршката премиера на серијата „East of Eden“ на 30 септември.

Целосната листа можете да ја погледнете на линкот.