Министри и претставници од Европската Унија и шесте партнери од Западен Балкан, меѓу кои и Македонија, се среќаваат на 5 и 6 ноември во Будва. Со министерскиот форум за правда и внатрешни работи претседава ирскиот министер Џим О’Калаган.

Од интернет-измами до управување со границите

Првиот ден е резервиран за министрите за внатрешни работи. Според објавената агенда, тие ќе разговараат за откривање и истрага на интернет-измами, спречување сексуална злоупотреба на деца на интернет, како и за соработката во миграцијата, азилот и управувањето со границите.

Илустративна фотографија од најавата за форумот. Фото: Ирско претседателство со Советот на ЕУ

Корупцијата и заштитата на децата на вториот ден

Министрите за правда на 6 ноември ќе разговараат за спречување и откривање корупција, вклучително и во изборните процеси. На агендата се и законските механизми за поддршка и заштита на деца што биле жртви на кривични дела. На форумот е најавен и европскиот комесар за правда Мајкл Мекграт.

Форумот се одржува од 2003 година и служи за соработка меѓу ЕУ и партнерите од Западен Балкан во областа на правдата и внатрешните работи.

Извори: Ирско претседателство со Советот на ЕУ и Влада на Црна Гора.

Будва, архивска фотографија. Фото: РТВ Будва