Ова едноставно јадење не бара многу состојки ниту комплицирани чекори, а комбинацијата од кремаст прелив, растопено сирење и запечена брокула го прави одличен избор за лесен оброк или прилог со месо.

Потребни состојки:

• 1 кг. брокула
• 400 гр. кисела павлака
• 2 јајца
• 150 гр. рендано сирење (гауда, едамер или чедар)
• 1 чешне лук
• 1 лажица путер
• половина лажичка сол
• малку црн пипер
• прстофат мускатно оревче
• 2 лажици презла

Подготовка:

Измијте ја брокулата, разделете ја на помали цветови и отстранете ги потврдите делови од стеблото. Во поголемо тенџере загрејте посолена вода, а кога ќе зоврие, додајте го зеленчукот. Варете четири до пет минути, колку малку да омекне, но да ја задржи цврстината.

Потоа исцедете и кратко исплакнете го со ладна вода за да го запрете процесот на варење. Оставете го неколку минути добро да се исцеди.

Во подлабок сад измешајте ги киселата павлака и јајцата, а потоа додајте го ситно сечканиот или истиснат лук, солта, црниот пипер и прстофат мускатно оревче. Добро измешајте ги сите состојки.

Одвојте приближно една третина од ренданото сирење за подоцна да го наросите одозгора, а остатокот додајте го во смесата со павлака и јајца.

Загрејте ја рерната на 200 степени. Огноотпорниот сад премачкајте го со путер и во него распоредете ја исцедената брокула. Прелијте со подготвената смеса и лесно промешајте за кремастиот прелив рамномерно да ги обложи сите парчиња.

Одозгора распоредете го преостанатото рендано сирење, а за дополнителна крцкавост можете да наросите и две лажици презла.

Ставете го садот во загреана рерна и печете 25 до 30 минути, односно додека сирењето не се растопи, а површината не добие убава златнокафеава боја. Ако сакате покрцкава коричка, при крајот на печењето можете да го вклучите горниот грејач на неколку минути, внимавајќи сирењето да не загори.

Кога јадењето ќе биде готово, извадете го од рерната и оставете го да отстои околу пет минути за преливот малку да се стегне. Уживајте!