[ВИДЕО] Дефект во сигнализацијата и можна човечка грешка: нови детали за железничката несреќа во Шпанија

Во тешката железничка несреќа што утрово се случи во Шпанија загинаа десетици луѓе, а шпанските медиуми само неколку часа подоцна објавија што, според првичните сознанија од истрагата, довело до трагедијата.

Како што јавува шпанскиот весник „АБЦ“, два брзи воза, АВЕ 2080 со 397 патници и „Ирио“ 6076 со 147 патници, на линијата што ги поврзува Андалузија и Мадрид, се судриле во средата наутро, околу 9 часот. Десет минути подоцна, Управата за железничка инфраструктура (Адиф) на социјалните мрежи ја известила јавноста дека железничкиот сообраќај е запрен поради судир на два воза.

Првичните информации за околностите на несреќата укажуваат на човечка грешка.

Според сознанијата на весникот „АБЦ“, добиени од извори во Министерството за транспорт, еден работник отстранувал дефект во системот за сигнализација, поради што возот АВЕ не добил предупредување дека во негова близина се наоѓа друг воз.

Според првичните претпоставки на Цивилната гарда, двата воза биле запрени, а на едниот од нив, возот АВЕ, му било наредено да тргне, без да биде известен дека „Ирио“ сè уште стои непосредно пред него.

Следувал силен судир, поради кој двата воза излетале од шините и завршиле на насипот покрај пругата.

Службите за итни случаи уште од самиот почеток предупредиле дека трагедијата би можела да однесе неколку десетици животи.

Цивилната гарда ги ангажирала сите расположливи припадници во областа. Тие веднаш започнале со евакуација на загрозените патници и им помагале на екипите на итната медицинска помош да пристигнат на местото на несреќата и да им укажат помош на повредените и на жртвите.

Според последните информации, во несреќата загинале најмалку 50 патници.