Објавувањето на изборните резултати и признавањето на поразот од страна на Александар Вучиќ на вонредните парламентарни избори во Србија, беа проследени од водечките руски државни медиуми и новински агенции со изразен наратив за мешање на западните разузнавачки служби и геополитички инженеринг. Во своето известување, руските медиуми се фокусираат на тврдењата за „обоена револуција“, ризикот од дестабилизација на Западен Балкан, како и на иднината на енергетските и стратешките односи меѓу Белград и Москва.

„РТ“, руска државна телевизиска мрежа која емитува програма на англиски и руски јазик, ги истакнува изјавите на Вучиќ во кои тој победата на опозицијата ја припишува на активностите на западните разузнавачки мрежи.

„Класичен пример за обоена револуција“

„РТ“ известува за реакции кои сугерираат дека „координираниот притисок од САД и Европската Унија го испланирал изборниот исход“, опишувајќи ја листата предводена од студенти како оперативна алатка организирана од западните центри на моќ. Во својата анализа, „РТ“ наведува дека победата на проевропските сили претставува обид за трајно истиснување на руското влијание од Балканот.

Државната новинска агенција „РИА Новости“, во опширни аналитички написи и коментари, ги опишува настаните во Белград како класичен пример за „обоена револуција“ спонзорирана од Западот.

Агенцијата укажува на долготрајното балансирање на Вучиќ меѓу Истокот и Западот, оценувајќи дека на западните сили им пречела суверената политика на Србија – особено во однос на одбивањето да го признае Косово и одлуката да не воведува санкции кон Руската Федерација. „РИА Новости“ исто така напоменува дека новата влада ќе се соочи со сериозен предизвик во одржувањето на стабилно снабдување со гас, без долгорочни договори со Москва.

Во своите извештаи, официјалната новинска агенција „ТАСС“ задржува посув, фактографски тон, фокусирајќи се на официјалните податоци од Републичката изборна комисија (РИК) и на техничките чекори поврзани со уставниот пренос на власта.

Можен проевропски преокрет за Србија

Сепак, во своите дипломатски анализи, „ТАСС“ пренесува предупредувања од руски аналитичари дека брзиот преокрет на новата српска влада кон Европската Унија и НАТО би можел да предизвика внатрешни поделби во земјата и дополнително да ја дестабилизира безбедносната ситуација во северно Косово.

Рускиот дневен весник „Известија“ ја фокусира својата анализа на економските аспекти од промената на власта во Србија. Весникот истакнува дека, досега, Србија имала корист од повластените цени за рускиот природен гас и блиските врски со „Гаспром“ – фактори што го претставувале темелот на нејзината енергетска стабилност. „Известија“ пренесува дека во деловните кругови постои загриженост оти проевропската ориентација на новата власт би можела да ги загрози билатералните трговски договори и да доведе до ревизија на клучните енергетски проекти.

Во своите извештаи, агенцијата „Спутник“ нуди детална анализа за улогата што ја одиграле невладините организации финансирани од Западот, како и социјалните мрежи, во мобилизирањето на гласачкото тело. Според проценките на „Спутник“, изборниот резултат во голема мера бил обликуван од долгорочни медиумско-пропагандни кампањи насочени против владејачката коалиција, при што се сугерира дека западните партнери сега ќе бараат од Белград итно усогласување на надворешната политика со одлуките на Брисел.