Во Кина, 110 хуманоидни роботи поставија Гинисов светски рекорд во синхронизирано танцување.
Индустријата за хуманоидни роботи во Кина преминува од поединечни демонстрации кон примена во големи размери. Во тој контекст, 110 хуманоидни роботи во саботата поставија Гинисов светски рекорд за најголем број хуманоидни роботи што танцуваат истовремено, во градот Џинан, во кинеската провинција Шандонг, пренесе „Global Times“.
Вкупно 110 хуманоидни роботи „Expedition A3“, развиени од кинеската компанија „AgiBot“, изведуваа синхронизирани танцови движења и промени на формациите, користејќи ја компаниската платформа за групно управување „LinkBots“ и технологија за ултраширокопојасно позиционирање, која овозможува прецизност на ниво на сантиметар.
Компанијата „AgiBot“ соопшти дека сите 110 роботи изведувале синхронизирани движења без прекин, вклучувајќи промени на положбата, скокови, превртувања и промени на формациите.
Компанијата најави дека роботите ќе бидат ангажирани на културни и туристички настани, во јавните служби, научните истражувања и образованието, како и во други области.
Претставник на кинеското Министерство за индустрија и информатички технологии на 19 октомври изјави дека кинеските компании развиле повеќе од 400 модели хуманоидни роботи и произвеле повеќе од 40.000 примероци во првата половина од годинава, како и дека се очекува годишното производство да надмине 100.000 примероци.
