Францускиот претседател Емануел Макрон ја одби понудата за оставка на министерот за внатрешни работи Лоран Нуњез, по немирите што се проширија за време на викендот, соопштија од Елисејската палата. Демонстрантите изразуваат незадоволство поради зголемените трошоци за живот, влошувањето на јавните услуги и состојбата во образовниот систем.

Макрон изјави дека Нуњез треба да остане на својата функција за да се одржи командниот ланец во полицијата и безбедносните сили. Исто така, тој побара од Нуњез што поскоро да осмисли нови пристапи за сузбивање на грабежите, додаваат од Елисејската палата.

Најтешкото нарушување на јавниот ред во модерната француска историја

Протестите низ земјата во саботата прераснаа во немири. Во неделата дојде до нови судири во Париз и Марсеј, каде што полицијата за разбивање немири спречи обиди за ограбување на деловни објекти. Францускиот премиер Себастиен Лекорну денеска одржува итен состанок на владата за да ги процени последиците од насилството и грабежите што ја зафатија земјата за време на викендот, пренесува Би-би-си.

Во одредени аспекти, ова претставува најтешко нарушување на јавниот ред во модерната француска историја. Се проценува дека околу 1.500 продавници и деловни објекти биле ограбени или уништени. Полицијата за разбивање немири употреби солзавец и водени топови против толпата.

Француското Министерство за внатрешни работи соопшти дека во саботата биле повредени околу 1.000 полицајци, од кои седуммина потешко. Макрон во неделата ѝ се обрати на јавноста, изјавувајќи дека протестите ќе бидат забранети доколку е потребно, и повика на мир и ред. Тој нагласи дека учесниците во немирите ќе бидат казнети и ќе одговараат за своите постапки.