Украинскиот претседател Владимир Зеленски денес во Брисел изјави дека е полесно да се соработува со американскиот претседател Доналд Трамп отколку со рускиот лидер Владимир Путин, нагласувајќи дека нивните состаноци секогаш даваат можност за дискусија и носење одлуки.
Зборувајќи по самитот на ЕУ, Зеленски го обвини Путин дека навистина не сака да го заврши конфликтот и оцени дека реториката на Русија за мир е само изговор за подготвеност за преговори.
„Тој не сака војната да заврши. Убеден сум дека затоа дури и Донбас е премал за него“, рече Зеленски, алудирајќи на територијалните претензии на Русија.
Во исто време, Зеленски изрази надеж дека европските земји ќе најдат начин за директни разговори со Русија. Таквиот формат, според него, би му овозможил на Киев да не се потпира исклучиво на дипломатските напори на Соединетите Американски Држави.
Зеленски нагласи дека воспоставувањето европски канал за комуникација нема да значи исклучување на која било страна од мировниот процес, но не даде конкретни детали за тоа како би можеле да се организираат такви разговори.
