„Lonely Planet“ го опишува Леон како алтернатива на популарните шпански дестинации како што се Мадрид, Барселона и Ибица. Тие особено го нагласуваат неговото историско јадро, гастрономската понуда и фактот дека во градот можете да најдете знаменитости што се натпреваруваат со многу попознати туристички атракции.

Катедрала наречена „Куќа на светлината“

Едно од првите нешта што ви го привлекува вниманието во Леон е неговата катедрала од 13 век. Изградена е по моделот на француската готика и е позната под прекарот „Pulchra Leonina“, односно „убавина од Леон“. Поради бројните витражи, се нарекува и „Куќа на светлината“.

Катедралата има дури 125 прозорци со повеќе од 1.800 квадратни метри витраж, заедно со богато украсени камени детали и високи кули. Посетителите редовно ја фалат на „TripAdvisor“.

„Вистински бисер во град донекаде запоставен од туризмот. Готско чудо на исто ниво со катедралата во Ремс“, пишува во еден осврт. Друг посетител напишал: „Мислам дека ова е најспектакуларната катедрала што некогаш сум ја видел. Вреди да се плати влезницата.“

Во Леон со пијалак добивате и тапас

Атмосферата во градот се должи и на областа Barrio Húmedo, историски дел од Леон полн со барови и ресторани. Во него има повеќе од сто барови, а особено е познат по обичајот кој ќе им се допадне на љубителите на храна - со нарачаниот пијалак добивате гратис тапас.

Заедно со чаша локално вино или пиво, можете да добиете крокети, разни чорби и други обилни закуски. Квартот особено оживува навечер, кога тесните улички и плоштади се полни со луѓе.

Град каде што историјата се меша со модерниот живот

Леон не е интересен само поради катедралата. Базиликата Свети Исидор е една од најважните романски градби во градот, а поради фреските често се нарекува „Систинска капела на романската уметност“. Изградена е на местото на римски храм.

Тука е и Casa Botines, зграда дизајнирана од Антони Гауди, во која денес се наоѓа музеј со колекција на шпанска уметност од 19-ти и 20-ти век. Историскиот центар најдобро се истражува пеш, минувајќи низ тесни улички и по остатоците од средновековните ѕидини.

За одмор, има паркови и градини покрај реката Бернесга, додека бројни ресторани и барови нудат можност да се запознаете со локалната гастрономија.

Писателот Марк Евели за „Lonely Planet“ ја истакна токму таа комбинација од различни лица на градот.

„Преку ден, ќе запознаете град длабоко вкоренет во северна Кастиља, со неговите величествени споменици, католичко наследство и позиција на поклоничката рута Камино де Сантијаго. Ноќе, Леон е полн со забава што трае до доцна и се прелева низ тесните улици и плоштади на живописниот стар град. Тоа се два града во еден“, напишал тој.