Добрата вест е дека и двете активности можат да бидат корисни.
Високиот крвен притисок е еден од најчестите здравствени проблеми, а редовната физичка активност може да биде важен дел од неговото контролирање.
Меѓу наједноставните опции се одењето и трчањето, но се поставува прашањето – која од овие две активности има поголем ефект?
Добрата вест е дека и двете можат да бидат корисни. Брзото одење претставува достапен начин да се зголеми физичката активност, да се подобри циркулацијата и со текот на времето да се придонесе за намалување и на горниот и на долниот крвен притисок.
Една метаанализа покажала дека редовното одење во просек може да го намали систолниот притисок за околу 4 mmHg, а дијастолниот за околу 2 mmHg. Дополнителна придобивка е влијанието на физичката активност врз стресот, кој е еден од факторите поврзани со покачениот крвен притисок.
Трчањето исто така поволно влијае врз кардиоваскуларниот систем. Тоа претставува поголем напор за организмот, го тренира срцето поефикасно да ја пумпа крвта и може да придонесе за зачувување на еластичноста на крвните садови.
Истражувањата укажуваат дека трчањето може да доведе до нешто поизразено намалување на крвниот притисок, особено кај лицата кои веќе имаат хипертензија. Интересно е што умереното трчање не мора да биде помалку корисно од тренинзите со многу висок интензитет – кај луѓето со висок крвен притисок токму умерениот интензитет може да биде многу ефикасен.
Сепак, експертите нагласуваат дека нема голема корист од активност која ќе ја практикуваме неколку дена, а потоа целосно ќе ја напуштиме. Затоа одењето може да биде подобар избор за почетници, повозрасни лица или луѓе за кои трчањето претставува преголемо оптоварување.
На крајот, најдобрата активност е онаа што можете безбедно и редовно да ја практикувате. Како општа препорака за возрасните се наведуваат најмалку 150 минути физичка активност со умерен интензитет неделно или 75 минути поинтензивна физичка активност.
Лицата кои веќе имаат висок крвен притисок, други кардиоваскуларни проблеми или долго време не вежбале, би требало да се консултираат со лекар пред да започнат поинтензивна програма за трчање.
