Тројца Американци кои јавно зборуваат за наводни тајни владини програми поврзани со неидентификувани аномални појави (UAP), односно НЛО, побараа од американскиот претседател Доналд Трамп да ги ослободи од обврските за доверливост за да можат јавно да кажат што тврдат дека знаат за можни летала и материјали од нечовечко потекло.

Дејвид Граш, Дилан Борланд и Метју Браун тврдат дека до чувствителни информации дошле преку работа во или со американскиот безбедносен и разузнавачки систем и дека договорите и правилата за заштита на класифицирани информации ги спречуваат јавно да откријат детали.

Нивните тврдења за летала од нечовечко потекло и биолошки материјали досега не се независно потврдени. Пентагон претходно соопшти дека не пронашол проверливи докази дека американската влада или приватни компании поседувале вонземска технологија или спроведувале програми за нејзино обратно инженерство.

Граш претходно сведочеше пред Конгресот

Најпознат меѓу тројцата е поранешниот американски разузнавач Дејвид Граш, кој во 2023 година сведочеше под заклетва пред Конгресот.

Тој тогаш тврдеше дека американските власти со децении спроведувале тајни програми за пронаоѓање остатоци од паднати неидентификувани летала. Граш изнесе и тврдења за пронајден „нечовечки биолошки материјал“, но рече дека дел од информациите не може јавно да ги изложи поради нивната класифицирана природа.

Сега тој вели дека е подготвен да даде подетални информации доколку добие официјално одобрение.

„Господине претседателе, дајте ни одобрение и подготвени сме“, порача Граш.

Тој тврди дека видел фотографии и видеоснимки од операции за извлекување на летала, вклучително и снимки од самите објекти и од, како што ги опишува, „нечовечки патници“.

Борланд тврди дека видел огромен триаголен објект

Дилан Борланд, ветеран на американското воздухопловство и поранешен геопросторен разузнавач, во септември 2025 година сведочеше пред комитет на Претставничкиот дом.

Тој тврди дека во 2012 година видел голем триаголен објект кој лебдел во близина на објект на НАСА, а потоа со голема брзина исчезнал.

Борланд сега вели дека сака јавно да изнесе повеќе информации, но дека за откривање класифицирани докази е потребно одобрение од американските власти.

„Пронајдовме материјали и ентитети – биолошки материјали“, тврди Борланд, без јавно да понуди докази со кои независно би можело да се потврди неговото тврдење.

Наводната програма „Immaculate Constellation“

Метју Браун, поранешен соработник во одбранбениот сектор, јавно проговори за наводна тајна програма наречена „Immaculate Constellation“, за која тврди дека собира информации за UAP од различни делови на американскиот државен апарат.

Браун вели дека договорите за доверливост што ги потпишал му забрануваат без претходно одобрение од владата јавно да открива класифицирани информации до кои дошол при работата на прашања поврзани со националната безбедност.

Пентагон, од друга страна, претходно соопшти дека нема евиденција за постоење сегашна или поранешна специјална програма со име „Immaculate Constellation“.

Бараат дозвола јавно да проговорат

Апелот на тројцата доаѓа откако администрацијата на Трамп воведе механизм што им овозможува на сегашни и поранешни владини службеници да доставуваат одредени класифицирани информации за UAP до федералните власти.

Механизмот, сепак, не претставува општа дозвола тие информации да бидат објавени во јавноста.

Токму затоа Граш, Борланд и Браун бараат од Трамп да им овозможи јавно да зборуваат без опасност од правни последици поради откривање класифицирани информации.

Нивното барање го поддржуваат и дел од членовите на американскиот Конгрес кои подолго време бараат поголема транспарентност околу владините информации за UAP.