Уште една летна сезона и периодот на одмори е при крај, па вистинско време е за уште еден осврт, а најновите податоци објавени во последното истражување покажуваат дека состојбата во Европа во текот на 2025 година е подобрена.

Истражувањето го опфатило периодот од 2015 до 2025 година, а 27,5 отсто од населението постаро од 16 години изјавило дека не може да си дозволи една недела годишен одмор надвор од домот, што е намалување во однос на 35,2 отсто, колку што изнесувал процентот во 2015 година.

Состојбата генерално навистина се подобрила, но не во сите држави, особено не меѓу кандидатите за членство во Европската Унија.

Црна Гора и Албанија убедливо стојат најлошо, додека Србија ја дели позицијата со Италија со 36 отсто и не е далеку од европскиот просек. Истовремено, Србија за 10 години, од 2015 до 2025 година, постигнала напредок и од 68,5 отсто од оние кои не можеле да си дозволат одмор, го преполовила резултатот.

Повеќе од половина од населението не можело да си дозволи одмор и во Црна Гора (58 отсто), Албанија (53 отсто) и Турција (51 отсто). Македонија (48 отсто) и Грција (47 отсто) исто така се блиску до тоа ниво.

Над една третина е и во Бугарија (39 отсто), Унгарија (39 отсто), Србија (36 отсто) и Италија (36 отсто).

Пред 15 години било уште потешко

Речиси две петтини од луѓето (38,8 отсто) пред петнаесет години во Европската Унија не можеле да си дозволат една недела одмор, а тој удел постепено се намалувал откако во 2012 година достигнал врв од 40,5 отсто, за во 2019 година да падне на 28 отсто, по што се движи релативно стабилно околу 27–28 отсто.

Кога ќе се споредат податоците за 2015 и 2025 година, во 25 од 30 земји е забележано намалување на уделот на оние кои не можат да си дозволат одмор, а интересно е што од петте земји во кои е забележан раст, три се нордиски – Норвешка 3,8, Шведска 3,2 и Финска 1,5.

Уделот на луѓето кои не можат да си дозволат една недела одмор надвор од домот се намалил за 33 и 32 процентни поени во Хрватска и Србија во текот на претходните 10 години.