Поранешен вработен во компанијата „Meta“ во средата сведочеше дека некои од алатките за безбедност на „Facebook“ и „Instagram“ биле „дизајнирани да не успеат“, со што директно ѝ противречеше на одбранбената стратегија на компанијата во големиот судски процес во Калифорнија.
„Meta“ втор ден по ред се соочува со обвинувања од коалиција на американски сојузни држави дека намерно ги дизајнирала своите производи за да привлече деца и тинејџери, да ја зголеми нивната зависност од платформите и да ги собира нивните податоци, додека истовремено ја доведувала јавноста во заблуда за ризиците.
Губењето на спорот за оваа технолошка компанија би можело да резултира со казна од дури 200 милијарди долари, да ја принуди на темелни промени во деловниот модел и да има далекусежни последици за целата индустрија на социјалните мрежи.
„Meta“ не негира дека некои корисници, вклучително и тинејџери, имаат негативни искуства на нејзините две клучни платформи. Компанијата, сепак, тврди дека развила функции со кои се обидува да ги намали овие ризици.
„Не може да има спор околу тоа дека ’Meta‘ препозна дека луѓето можат да имаат тешкотии при користењето на социјалните мрежи и се обиде да осмисли алатки кои ќе им помогнат“, изјави адвокатот на „Meta“, Пол Шмит, за време на воведното излагање во вторникот.
Меѓутоа, „Meta“ некои од овие алатки ги поставила како опционални, што значи дека корисниците мора самите да ги активираат. Меѓу нив е и функцијата „Take a Break“, воведена во 2021 година, која на корисниците на „Instagram“ им овозможува да постават потсетници за да направат пауза од скролањето.
„Според моето искуство, функцијата ’Take a Break‘ беше дизајнирана да не успее“, изјави Артуро Бехар, поранешен директор за инженерство во „Meta“, за време на вториот ден од процесот, кој би требало да трае околу шест недели.
Бехар е првиот сведок кој беше сослушан во овој процес. Тој тврди дека компанијата му давала предност на профитот во однос на безбедноста на корисниците, поттикнувајќи ги да поминуваат сè повеќе време на „Facebook“ и „Instagram“.
Таквата стратегија, според неговото сведочење, довела до одлуки безбедносните функции да бидат опционални, вклучително и алатките наменети за спречување на бескрајното скролање и ограничување на привлечните известувања.
„Известувањата се направени и дизајнирани така што да ги вратат луѓето на платформата, за да поминуваат повеќе време и да носат поголеми приходи. Тие не се дизајнирани за менталното здравје … ниту за безбедноста на корисниците“, изјави Бехар во средата.
Неколку дена пред почетокот на процесот, „Meta“ се обидела да го спречи Бехар да сведочи, но судијата го одбил тоа барање.
