Сместено над долината Лаутербрунен во Швајцарија, алпското село Венген го зачувало својот мир благодарение на целосната забрана за автомобилски сообраќај. Главната врска со светот е историската запчеста железница.
Во ерата на брзиот туризам и загадените градски јадра, швајцарските Алпи чуваат бисер кој му пркоси на модерното темпо на живот. Селото Венген, сместено во регионот Јунгфрау на околу 1274 метри надморска височина, меѓу туристичките работници и локалното население го носи прекарот „заспаната убавица“ на Швајцарија.
Она што го прави Венген посебен е фактичкиот статус на зона без автомобили. Во ова населено место, во кое живеат околу 1300 жители, влезот со автомобили е целосно забранет. За сите посетители кои пристигнуваат со сопствен превоз, патувањето со автомобил завршува во подножјето, во местото Лаутербрунен, каде што возилата се оставаат во повеќекатни гаражи.
Единствената моторизирана врска со селото е запчестата железница „Wengernalpbahn“, која ги превезува патниците по стрмната алпска нагорнина во возење од околу петнаесет минути.
Освен со воз, до Венген во потоплите месеци може да се стигне само пеш – по уредени планинарски патеки – или со планински велосипед.
Во самото село единствените дозволени возила се малите електрични комунални и хотелски возила. Токму оваа изолираност од патниот сообраќај му ја обезбедила на Венген титулата на една од најмирните дестинации во Бернските Алпи.
Чистиот планински воздух, традиционалните дрвени куќи со живописни детали и панорамскиот поглед кон доминантните врвови Ајгер, Менх и Јунгфрау прават престојот во ова место да делува како влегување во разгледница.
Иако со децении важел за тивка алтернатива на попознатите алпски центри како што се Сент Мориц или Цермат, Венген во последно време привлекува сè поголемо внимание од меѓународните патници.
Со отворањето на современи хотелски капацитети од висока категорија, ова традиционално село полека се буди од својот повеќедецениски „сон“, притоа задржувајќи го својот клучен адут – автентичниот алпски мир кој започнува во оној момент кога ќе стапнете на железничкиот перон.
