Пратеникот од ВМРО-ДПМНЕ, Бране Петрушевски, го критикува СДС за ширење паника и дезинформации, наведувајќи дека институциите ја потврдуваат безбедноста на водата во Гостивар и Скопје, додека опозицијата измислува кризи за да создаде недоверба кај граѓаните.
„Неколку дена беа доволни за да се види целата политичка матрица на талогот од СДС. Прво создаваат сомнеж, потоа шират паника, па дезинформации, а кога институциите ќе ги демантираат со факти, ниту извинување, ниту одговорност. Тоа не е одговорна опозиција, туку политика која опстојува на создавање недоверба кај граѓаните“, вели Бране Петрушевски, пратеник на ВМРО-ДПМНЕ.
„За водата во Скопје се пласираа тврдења кои надлежните институции веднаш ги демантираа. За Гостивар, последните испитувања покажаа дека водата повторно е безбедна за пиење. Наместо овие информации да бидат поздравени, СДС продолжува со обиди да создава сомнеж.
Прашањето е едноставно, а тоа е зошто на СДС му пречи кога институциите ќе покажат дека системот функционира и дека проблемот е решен?
Очигледно е дека освен вештачко создавање на криза, страв и паника, немаат што да понудат.
Додека Филипче одмора со Заев на јахтата во Паљури, неговите пајташи се обидуваат од секоја тема да создадат какафонија. Граѓаните заслужуваат факти, а не сценарија за создавање страв и паника.
Водата во Гостивар е безбедна за пиење, институциите ја следат состојбата, а СДС треба конечно да разбере дека со ширење паника не се гради доверба кај граѓаните“, изјави Бране Петрушевски, пратеник на ВМРО-ДПМНЕ.
