Во нови израелски напади врз Појасот Газа загинаа најмалку 18 Палестинци, вклучувајќи и деца. Израелската страна тврди дека нападите биле насочени кон команданти на Хамас, додека палестинските власти информираат за голема штета и жртви меѓу цивилите. Министерот за енергетика на Израел јавно порача дека операциите продолжуваат додека Хамас не се разоружа.
Најмалку 18 Палестинци загинаа во новите израелски напади врз Појасот Газа, соопштија палестински медицински извори.
Нападите биле извршени врз Газа, Деир ал Балах и Кан Јунис, а меѓу загинатите има и деца. Палестинските служби наведуваат дека во нападите биле погодени куќи и шатори во кои биле сместени раселени лица.
Израелската армија соопшти дека нападот во Деир ал Балах бил насочен кон двајца команданти на елитната единица „Нухба“ на Хамас.
Во меѓувреме, и покрај најавите на американскиот претседател Доналд Трамп за напредок кон прекин на огнот, израелскиот министер за енергетика Ели Коен изјави дека нема договор за запирање на воените операции и дека Израел би можел да ја преземе целосната контрола врз Газа доколку Хамас не се разоружа.
Од Хамас порачаа дека покажале значителна флексибилност, но инсистираат Израел прво да ги запре нападите и да ги повлече своите сили од Газа.
