Сегашната сопственичка Луиз Хјустон го купила запуштениот објект на аукција во Челтенам во 2011 година за само 35.000 фунти, со идеја да има место каде ќе престојува кога ќе го посетува семејството.

За правни и административни трошоци потрошила уште околу 5.000 фунти, а во реконструкцијата вложила дополнителни 45.000 до 50.000 фунти, претворајќи го поранешниот јавен тоалет во модерна куќа за одмор.

Кога проектот бил завршен во 2019 година, имотот почнал да се издава преку „Ербиенби“, по цена од околу 120 фунти за ноќевање.

Поради прекрасната природа и близината на пешачките патеки, куќата станала омилена меѓу планинарите, љубителите на природата и сопствениците на кучиња.

Денес располага со две двокреветни спални соби, секоја со сопствена бања, кујна со трпезарија, дневна соба и дополнителен тоалет.

„Моите деца сега се возрасни и полесно можат да дојдат кај мене во Корнвол. Мислам дека дојде време да го пуштам овој дом да започне ново поглавје со некој друг. Тоа беше моето мало бебе. Сè направив сама. Тоа беше вистински женски проект“, вели Хјустон.

Таа додава дека сама го обезбедила финансирањето, ги пронашла изведувачите и вложила многу труд и емоции во реализацијата на проектот.

Со години чекала дозвола

Кога го купила објектот, јавниот тоалет со години бил напуштен и сè уште ги имал старите санитарии.

„Изгледаше навистина ужасно“, се присетува таа.

Добивањето градежна дозвола било долг и тежок процес. Неколку нејзини барања биле одбиени, а конечно добила зелено светло дури по третата или четвртата апликација.

Дополнителен проблем било тоа што локалните власти првично инсистирале објектот и понатаму да изгледа како поранешен јавен тоалет, наместо да добие изглед на традиционална викендичка со покривни прозорци.

Откако конечно добила дозвола, започнала целосната реконструкција. Старите тоалети и писоари биле отстранети, подот бил раскопан за поставување изолација, покривот бил подигнат за да се добие поголема висина, а бил изграден и кат со спалните соби.

Време е за нов проект

Хјустон вели дека куќата била многу барана кај туристите, особено затоа што секоја спална соба има сопствена бања.

„Ова е прекрасно место. Во околината има километри патеки за прошетка, а во близина има и паб и хотел. Гостите навистина уживаат овде“, вели таа.

Сепак, решила да ја продаде викендичката за да го финансира својот нов проект во Корнвол, признавајќи дека одржувањето на имотот од толкава далечина станало сè потешко.

„Тешко ми е да најдам луѓе кои ќе се грижат за куќата, па логистички сè стана комплицирано. Треба да се посветам на мојот живот во Корнвол и на изградбата на нов дом. За жал, дојде време да го затворам ова поглавје“, вели таа.