Министерот Тимчо Муцунски во разговори со државниот секретар за ЕУ на Шпанија ја истакна важноста од кредибилен и еднаков процес на пристапување на Северна Македонија во Европската Унија, како и значењето на блиска соработка и забрзување на процесот на проширување.
Министерот за надворешни работи и надворешна трговија, Тимчо Муцунски, денеска оствари средба со Фернандо Мариано Сампедро Маркос, државен секретар за ЕУ во Министерството за надворешни работи, ЕУ и соработка на Шпанија.
„Во фокусот на разговорите беа европската интеграција на Република Северна Македонија и актуелните случувања во процесот на проширување на Европската Унија. Министерот Муцунски изрази благодарност за доследната и принципиелна поддршка од Шпанија за европската перспектива на земјата, како и за нејзината посветеност проширувањето да остане меѓу стратешките приоритети на Унијата“, соопшти Министерството.
Муцунски ја нагласил важноста од блиска соработка и координација со Шпанија во претстојните дискусии за иднината на политиката на проширување.
„Процесот на пристапување мора да остане кредибилен, предвидлив, еднакъв за сите и заснован на заслуги, со јасна крајна цел – полноправно членство во ЕУ, паралелно со унапредувањето на практичните форми на постепена интеграција“, истакнал министерот.
Воедно, тој го информирал соговорникот за резултатите од спроведувањето на Реформската агенда и за посветеноста на Владата кон доследно спроведување на европските вредности и стандарди на национално ниво.
Соговорниците ја потврдиле важноста од натамошно продлабочување на билатералната соработка во рамките на европските процеси, како и неопходноста од зачувување на кредибилитетот на политиката на проширување и забрзување на пристапниот процес на земјата.
