Позната по тоа што вешто ја комбинира високата мода со гранџ елементи и Y2K естетиката, британската поп-ѕвезда овојпат покажа дека врвниот стајлинг всушност се темели на квалитетни основни модни парчиња. За време на опуштена прошетка низ градот, таа демонстрираше формула за совршен дневен изглед што не е тешко да се ископира.

Основата на нејзиниот стајлинг се фармерки со рамен, благо проширен крој и необработени рабови – модел што повторно се врати во мода во последните неколку сезони.

Наместо впечатливи и сложени топови, пејачката се одлучила за едноставна црна маица, врз која носела црна, откопчана кошула со потписот на Ралф Лорен. Токму ваквиот слоевит начин на носење обична кошула му дава на изгледот доза на онаа препознатлива, ненаметлива урбана лежерност.

Модните додатоци ја прават целата разлика

Како и секогаш, Дуа знае дека моќта на добриот стајлинг се крие во внимателно одбраните детали. Целата комбинација ја надополнила со црни лакирани чизми со дискретна потпетица, кои малку отстапуваат од очекуваниот избор на патики за ваков тип на облека.

Сепак, вистинската ѕвезда на нејзиниот изглед е култната црна чанта „Hermès Birkin“, која вешто ја персонализирала врзувајќи шарена свилена марама околу рачката.

Суптилен накит и темни очила за сонце

Изгледот го заокружила со впечатливи очила за сонце со правоаголна рамка и долг златен синџир со интересен приврзок, кој совршено ја надополнил празнината на деколтето.

Без тешка шминка и со лежерно пуштена коса, пејачката уште еднаш потврдила дека за впечатлив и модерен изглед се потребни само малку модна разиграност и добро познавање на сопствениот стил.