Пратеникот на партијата Алтернатива за Германија (АфД), Мартин Рајхарт, се најде под сè поголем политички притисок откако беше објавена нова фотографија на која изгледа како да изведува нацистички поздрав.
Рајхарт категорично ги негирал обвинувањата, тврдејќи дека станувало збор за шеговит гест кој немал никаква врска со нацистички поздрав.
Фотографијата, која прв ја објави поткастот на „Политико“, „Inside AfD“, го прикажува Рајхарт, членот на германскиот федерален парламент — Бундестагот — како ја крева левата рака додека се смее, за време на приватен собир пред шест години.
Двајца сведоци кои биле присутни на настанот, а сакале да останат анонимни поради чувствителноста на темата, изјавиле дека гестот всушност бил шега.
„Тоа не беше Хитлеров поздрав“, изјавил Рајхарт за „Политико“. Наместо тоа, тој тврди дека гестот бил дел од „шеговита церемонија на витештво“ што ја извел со еден од присутните мажи.
Станува збор за Маркус Мочман, кој наводно клекнал на едно колено додека му предавал на Рајхарт „пријава“ за приклучување кон АфД, обраќајќи му се со „Мој фирер“. Мочман негирал дека ги употребил тие зборови, но ја потврдил автентичноста на фотографијата.
„Требаше да биде смешно“, изјавил Мочман за „Политико“.
Инцидентот доаѓа во исклучително чувствителен политички момент за АфД. Партијата води во анкетите пред двата важни покраински избори во источна Германија, кои ќе се одржат во септември.
Конзервативците на Мерц, кои во моментов заостануваат зад АфД во националните анкети, остро го осудија Рајхарт.
Премиерот на Саксонија-Анхалт, Свен Шулце од конзервативната партија, изјавил: „Нацистичкиот поздрав е израз на убедување, а не грешка. Секој кој покажува нешто такво нема место во парламентот“.
И покрај жестоките критики, не е јасно дали овој инцидент посериозно ќе влијае врз поддршката за АфД, особено во поранешна Источна Германија, каде што недовербата кон главните партии и медиумите е значително пораспространета.
Националното раководство на АфД се обидува да ја претстави партијата како сериозна и кредибилна владејачка сила и покрај низата скандали во кои нивните политичари се соочуваа со обвинувања за екстремистичка реторика.
Досегашните скандали не успеаја значително да ѝ наштетат на партијата. Напротив, АфД во националните анкети достигна нови рекорди.
Рајхарт не е само пратеник во Бундестагот, туку и претседател на огранокот на АфД во Саксонија-Анхалт, една од покраините каде што во септември ќе се одржат избори.
Актуелните анкети покажуваат дека АфД во таа покраина ужива поддршка од речиси 42 отсто, што е многу блиску до апсолутно мнозинство и би ѝ овозможило на партијата, првпат од нејзиното основање во 2013 година, самостојно да ја преземе власта во некоја од германските покраини.
Германската разузнавачка агенција во Саксонија-Анхалт официјално го класифицираше тамошниот огранок на АфД како екстремистичка организација, но тоа не го запре неговиот подем.
Огранокот на АфД во Саксонија-Анхалт реагираше со објава на платформата Икс, нарекувајќи ги обвинувањата против Рајхарт „очајнички обид за започнување кампања за оцрнување“.
Овој случај не е изолиран. Пратеникот на АфД, Матијас Мосдорф, во моментов се соочува со кривична пријава поради наводно изведување нацистички поздрав во зградата на Бундестагот во 2023 година.
Судењето во неговиот случај е закажано за октомври, што го потврди портпаролката на берлинските кривични судови, Лиза Јани.
Мосдорф исто така ги отфрла обвинувањата.
„Одлучно го отфрлам обвинувањето дека сум извел таканаречен Хитлеров поздрав во просториите на Бундестагот и тоа го сметам за обид за политички атентат врз мојот карактер“, изјавил Мосдорф во април во поткастот „Inside AfD“.
Според германскиот закон, јавното прикажување на нацистички симболи и гестови, вклучително и „Хајл Хитлер“ е строго забрането.
При оценување на такви случаи, судовите земаат предвид дали објективен набљудувач би го протолкувал гестот како нацистички, без оглед на тоа дали станува збор за десната или левата рака.
Се очекува Рајхарт да се кандидира за уште еден мандат во сојузното раководство на АфД на партиската конвенција што ќе се одржи следниот месец.
