Норвешка ќе воведе речиси целосна забрана за користење алатки базирани на вештачка интелигенција за учениците во основното образование, додека нивната употреба кај постарите ученици ќе биде строго ограничена и контролирана.

Одлуката ја соопшти норвешкиот премиер Јонас Гар Стере, кој истакна дека целта е да се спречи негативното влијание на вештачката интелигенција врз процесот на учење.

„Користењето вештачка интелигенција го зголемува ризикот малите деца да прескокнат важни чекори во образованието. Најважно е учениците да научат да читаат, пишуваат и сметаат“, изјави Стере.

Новите правила ќе почнат да се применуваат од почетокот на новата учебна година, која во Норвешка започнува кон крајот на август.

Најстроги ограничувања за најмладите ученици

Според владините насоки, учениците од прво до седмо одделение, на возраст од 6 до 13 години, во принцип нема да користат алатки со вештачка интелигенција во наставата.

Учениците на возраст од 14 до 16 години ќе можат ограничено да се запознаваат со овие технологии, но исклучиво под надзор на наставниците.

Во повисокото средно образование, односно за учениците од 17 до 19 години, фокусот ќе биде ставен на правилно и одговорно користење на вештачката интелигенција како подготовка за понатамошното образование и пазарот на труд.

Промени и во користењето на технологијата во училиштата

Норвешка беше меѓу првите земји што масовно воведоа компјутери и таблети во наставата, постепено намалувајќи ја употребата на учебници и рачно пишување.

Сепак, поради загриженоста за образовните резултати, владата веќе презеде мерки за ограничување на технологијата во училиштата. Во 2024 година беше воведена забрана за користење паметни телефони во образовните установи.

Истовремено, властите најавија и законски измени со кои ќе се поттикне поголема употреба на печатени книги во наставата.

Планирана и забрана за социјалните мрежи

Норвешката влада во април годинава најави и планови за забрана на користењето социјални мрежи за лица помлади од 16 години, следејќи го примерот на Австралија и други земји кои настојуваат да ја намалат зависноста на младите од дигиталните уреди.