Иран се согласи на нацрт-договор со САД да не произведува или купува нуклеарно оружје, додека Вашингтон привремено ќе ги укине санкциите за иранската нафта и ќе ги ослободи замрзнатите средства.
Иран се согласи дека нема да произведува или да набавува нуклеарно оружје, според нацрт-меморандумот за разбирање постигнат меѓу иранските лидери и Соединетите Американски Држави, открива висок ирански функционер за новинската агенција.
Според изворот, деталите за тоа што ќе се прави со постојниот збогатен ураниум на Иран ќе се решаваат во следните 60 дена по официјализирањето на почетниот договор. Техеран инсистира самиот да го спроведе процесот на разредување на нуклеарниот материјал во рамките на своите граници.
Како одговор на отстапките од иранска страна, Вашингтон се согласил привремено да ги укине санкциите за иранската нафта. Ова ќе му овозможи на Техеран непречено да продава нафта на глобалниот пазар и да ги задржи остварените приходи.
Клучен дел од овој потенцијален договор вклучува и итни мерки за деескалација на море:
– Иран се обврзува веднаш да го прекине затворањето и повторно да го отвори Ормутскиот теснец за меѓународен сообраќај.
– САД ќе ја прекинат поморската блокада што ја спроведуваат врз иранските пристаништа.
Иранскиот функционер додава дека нацрт-договорот предвидува САД да ослободат замрзнати ирански средства во вредност од дури 25 милијарди долари.
