Специјализирани нуркачи денеска ја продолжуваат исклучително сложената спасувачка операција за извлекување на четворица мажи кои сè уште се заробени во поплавена пештера во Лаос. Едно лице било успешно извлечено вчера, но четворица остануваат внатре, додека за уште двајца се трага, пренесува.

Спасувањето се одвива во екстремно тешки услови и зависи од повеќе фактори, меѓу кои и временските прилики.

Првата спасена личност е 23-годишниот Мјуед од селото Бан Фа Јаи, кој по 10 дена, бил извлечен синоќа.

Откако бил извлечен, завиткан во ќебе за спасување, тој им се заблагодарил на спасувачите.

„Сакам да им се заблагодарам на сите, на моето семејство, браќата и сестрите… голема благодарност до локалните и покраинските власти и до сите кои помогнаа“, изјавил Мјуед во видео објавено од организацијата Лао Саичаи фондација.

Меѓународен тим учествува во операцијата

Во спасувањето учествува меѓународен тим специјализирани нуркачи од Азија, Европа и Австралија. Меѓу нив се и ветерани од познатата операција за спасување деца од пештерата Там Луанг во Тајланд во 2018 година.

Во тимот има нуркачи од Јапонија, Франција, Австралија, Малезија и Индонезија, кои работат заедно во исклучително ризични услови.

Потрага по злато и драматичен пресврт

Група од осум селани влегла во пештерата во потрага по злато, но биле заробени поради ненадејни поплави. Еден од нив успеал да избега и да алармира помош на 23 мај.

Патот низ пештерата води низ тесни премини, остра карпеста структура и речиси целосна темнина. Температурата на водата е околу 22 степени Целзиусови, но видливоста е речиси нула.

Финскиот нуркач Мико Пааси, еден од водачите на операцијата, предупреди дека најавениот дожд може да ја претвори мисијата во катастрофа.

„Тоа би било катастрофа“, изјавил Пааси, додавајќи дека и најискусните нуркачи се соочуваат со екстремни ризици во вакви услови.

Ризична евакуација и здравствени проблеми

Според планот, секој заробен маж ќе биде придружуван од двајца професионални нуркачи при извлекувањето низ поплавените премини.

Четворицата кои остануваат во пештерата веќе почнале да покажуваат здравствени проблеми, вклучувајќи кожни и дигестивни тегоби, што дополнително ја отежнува операцијата.