Министерката за образование и наука, Весна Јаневска, по повод 5 Мај – Денот на македонскиот јазик, порача дека македонскиот јазик претставува едно од најголемите национални богатства и темел на македонскиот идентитет.
Таа потсети дека на 5 мај 1945 година е озаконета азбуката на македонскиот јазик врз принципот „еден глас – една буква“, нагласувајќи дека македонската писменост се надоврзува на богата претходна традиција и на живиот говор што се пренесувал низ генерации.
„Чувањето на јазичното наследство е долг на сите нас, тоа не е само институционална обврска, туку и лична одговорност“, истакна Јаневска.
Според неа, Министерството за образование и наука обезбедува институционална грижа за македонскиот јазик преку наставните програми, учебниците, научните истражувања и културните политики, како и преку стипендии за студии по македонски јазик и книжевност.
Јаневска додаде дека државата издвојува средства и за научно-истражувачки проекти поврзани со македонскиот јазик, како и за ангажирање лекторати на странски универзитети со цел негово ширење и негување надвор од земјата.
Во честитката, таа ги цитираше и зборовите на Крсте Петков Мисирков дека „свеста и чувството дека сме Македонци кои зборуваат македонски јазик треба да стојат повисоко од сè друго на светов“.
