Медузите најпрво се појавиле кај брегот на Оропос. Оттогаш се поместиле појужно, па биле забележани и кај Неа Макри, Зумбери и пристанишниот град Рафина.

Потоплата вода ги „турка“ виолетовите медузи кон грчките плажи

Локалните извештаи бележат и присуство на медузата од видот „Cotylorhiza tuberculata“, во Грција позната како „медуза пржено јајце“, во близина на брегот.

Експертите овој феномен го поврзуваат со порастот на температурата на морето во последните денови, што создало поволни услови за рано размножување на медузите во Грција, пишува „Greek Reporter“.

Медузата „пржено јајце“ може да достигне пречник и до 40 сантиметри и не претставува опасност за луѓето.

Големи наезди на медузи на плажите на Евија

Посеверно, долж северозападниот брег на Евија, забележани се масовни појави на медузи, вклучително и виолетови, на потег подолг од седум километри — од плажата Политика до плажата Дафни, покрај северниот дел на Евбејскиот Залив.

Размерите на овој феномен ги вознемириле локалните жители и сопствениците на туристички објекти, особено во пресрет на летната сезона, кога активностите на брегот се зголемуваат.

Честата појава на јата медузи во грчките води повторно ја отвори загриженоста поради промените во животната средина и нивното влијание врз морските екосистеми, крајбрежните заедници и туризмот.

Што е виолетова медуза?

Виолетовата медуза, односно „Pelagia noctiluca“, е релативно мал и живописен вид кој живее во топли и умерени мориња низ целиот свет. Таа е и биолуминисцентна, што значи дека може да произведува светлина. И нејзините пипала и ѕвоното содржат жарни клетки — нематоцисти — што е невообичаена особина кај медузите.

За разлика од безопасната „Cotylorhiza tuberculata“, виолетовата медуза може да предизвика болен убод.

Иако експертите главно не ја сметаат за опасна, нејзиниот убод може да предизвика болка, а симптомите понекогаш може да траат подолго време. Во ретки случаи може да се појават сериозни системски реакции кои бараат итна медицинска помош.

Јатата од видот „Pelagia noctiluca“ можат да уништат цели рибници, поради што овој вид е еден од најпроучуваните медузи во Медитеранот и пошироко.

Симптоми на убод од виолетова медуза

По контакт со кожата може да се појават интензивно чувство на печење, црвенило и трага. Убодот може да предизвика и мачнина, главоболка, повраќање, дијареја, пад на крвниот притисок, забрзана работа на срцето, бронхоспазам и отежнато дишење.

Доколку се појават симптоми како нагол пад на притисокот, засипнатост, отежнато дишење, нарушување на свеста или проблеми во комуникацијата, потребно е веднаш да се побара лекарска помош.