Белгија ги повикува граѓаните да се подготват за итни случаи

Кампањата има за цел да ја зајакне отпорноста на општеството и да поттикне поголема вклученост на граѓаните во справувањето со кризни ситуации кои можат да се случат „секаде и во секое време“, соопшти Националниот кризен центар, пренесува „VRT“.

„Свесноста и подготвеноста на самите граѓани се клучни за што поефикасно реагирање во вонредни ситуации. Секако нема потреба од паника, но секогаш е добро да се биде подготвен“, нагласи белгискиот министер за внатрешни работи Бернар Кентин во емисијата „De Oćtend“ на Радио 1.

Тој додаде дека во Белгија недостасува „култура на безбедност“.

„Мора да разбереме дека не живееме во истиот свет како пред 20 години. Тоа го видовме во Газа, во Украина, но тоа важи и за природните катастрофи. Се надеваме дека ова никогаш нема да биде потребно“, изјави тој.

Кризниот центар нагласува дека целта не е да се предизвика страв, туку да се подигне свесноста.

Потенцијални нуклеарни ризици

„Со години даваме совети за вонредни ситуации, со цел сите да бидат што подобро подготвени и службите за итна помош да можат да се фокусираат на оние на кои им е најпотребна“, наведува Центарот.

Посебен акцент е ставен и на навремено информирање, па на граѓаните им се препорачува да користат официјални канали како системот за предупредување „BE-Alert“, локалните медиуми и веб-страницата на Кризниот центар, за во кризна ситуација брзо да дојдат до проверени информации.

„За време на катастрофи, сите мора да знаат каде да бараат веродостојни информации. Во такви моменти, лажните вести брзо се шират, а некои дури и профитираат од тоа“, изјави портпаролот на Кризниот центар.

Планот на кампањата предвидува постепено проширување на темите, вклучувајќи и потенцијални нуклеарни ризици.