Според медиумот The Free Press, кој се повикува се на анонимни претставници на Ватикан, состанокот брзо се искомплицирал, при што претставници на Пентагон се обиделе да одржат предавања за воената моќ на САД
Пентагон во четвртокот ги негираше извештаите во некои медиуми дека во јануари повикал висок функционер на Ватикан за да побара поддршка од Римокатоличката црква за американската војска.
Аферата се случува во време кога папата Лав XIV, првиот американски папа во историјата, има затегнат однос со администрацијата на американскиот претседател Доналд Трамп. Тој се изјасни против американско-израелската војна против Иран и експлицитно рече дека ги отфрла молитвите на „оние што водат војна“.
На состанокот, одржан во Пентагон на 22-ри јануари пред почетокот на војната во Иран, присуствувале државниот потсекретар за воена политика Елбриџ Колби и францускиот кардинал Кристоф Пјер, апостолскиот нунциј во Вашингтон.
Според медиумот The Free Press, кој се повикува се на анонимни претставници на Ватикан, состанокот брзо се искомплицирал, при што претставници на Пентагон се обиделе да одржат предавања за воената моќ на САД, со забелешката дека „Црквата би направила добро да застане на нивна страна“.
Како одговор, Министерството за одбрана, преименувано во Министерство за војна под администрацијата на Трамп, објави на платформата X во четвртокот дека „неодамнешните извештаи за овој состанок се многу преувеличени и искривени“.
„Средбата меѓу претставниците на Пентагон и Ватикан резултираше со конструктивна и почитувана размена на информации“, се додава во соопштението.
Според истиот извор, наводно биле дискутирани различни теми, вклучувајќи „етички прашања во надворешната политика, образложението за стратегијата за национална безбедност на САД, Европа, Африка, Латинска Америка и други теми“.
Според Пентагон, „кардиналот Пјер ја поздрави иницијативата, а двете страни изразија интерес за продолжување на отворен и почитуван дијалог“.
Амбасадорот на САД во Ватикан, Брајан Бурч, исто така, ги осуди „таквите искривени претставувања на настаните што сеат поделби и недоразбирања“, опишувајќи ја средбата како „многу срдечна“.
Од неговиот избор за папа во мај, Лав XIV, роден во Чикаго, зазеде јасен став против одредени одлуки на администрацијата на Трамп, особено за имиграцијата, а на почетокот на јануари ја осуди „дипломатијата на сила“. Кредото на американскиот претседател е „мир преку сила“.
Меѓу членовите на администрацијата на Трамп, потпретседателот на САД, ЏејДи Венс и државниот секретар Марко Рубио се побожни католици и присуствуваа на инаугуративната литургија на првиот американски папа.
Папата Лав XIV неодамна назначи нов амбасадор во Соединетите Американски Држави, надбискупот Габриеле Качија, кој ќе го замени кардиналот Пјер, кој се пензионираше на 80-годишна возраст.
