Најмалку 15 лица загинаа, а 39 се повредени во израелските напади врз Либан, објави АФП, повикувајќи се на либанското Министерство за здравство.
Пет лица загинаа во нападот врз Бејрут, додека три лица беа убиени во напад врз станбена зграда во Аин Сааде, источно од главниот град. Меѓу загинатите е и четиригодишно девојче кое беше убиено во напад врз јужниот град Кфар Хата.
Во Израел, телата на две лица беа извлечени од погодена станбена зграда, објавија израелските медиуми.
Израелската војска објави дека извршила серија напади врз цели во Техеран, додека Ројтерс објави дека во американско-израелски напад врз станбена зграда во градот Ком загинале најмалку пет лица, а уште повеќе останале закопани под урнатините.
Обединетите Арапски Емирати и Кувајт, исто така, објавија дека нивните системи за воздушна одбрана пресретнале ракети и беспилотни летала.
