Проектот се темели на адаптирана биографија од француската авторка Клер Берест, а приказната ќе биде раскажана од мексиканска перспектива. Серијата ќе го истражува нивното уметничко партнерство, политичките ставови и вонбрачните врски.

Во својата најава, Нетфликс ја опишува серијата како приказна за „бомба завиткана во свила“, повикувајќи се на изјавата на водачот на надреалистите Андре Бретон, кој делото на Кало го опишал како „лента околу бомба“.

Актерската екипа и датумот на излегување на серијата сè уште не се објавени. Познато е дека дејството ќе го следи љубовниот и творечкиот живот на уметничкиот пар, како и сложените општествени и политички околности што ги обликувале нивните препознатливи дела. Животот на Кало и досега често бил тема на играни и документарни филмови, а мексиканско-американската актерка Салма Хајек за улогата во филмот „Фрида“ од 2002 година била номинирана за Оскар.

Турбулентен брак на „слонот и гулабицата“

Мајката на Фрида, наводно изразувајќи незадоволство пред нивниот прв брак, ги нарекувала „слон и гулабица“. И покрај разводот и бројните афери, нивниот однос останал силен и сложен. Двајцата делеле политички уверувања и биле блиски до марксистичките идеи. Меѓу најпознатите неверства се споменуваат аферата на Ривера со помладата сестра на Кало, како и наводната врска што Кало ја имала со Лав Троцки.

Популарност што не стивнува

Популарноста на Фрида не стивнува, за што сведочат и актуелните изложби. Во Музејот на ликовни уметности во Хјустон моментално е поставена изложба посветена на сликарката, чија слика пред шест месеци била продадена за 54,7 милиони долари, со што Кало станала најскапата латиноамериканска уметница во светот.

Во њујоршкиот Музеј на модерна уметност неодамна била отворена и голема изложба посветена на Кало и Ривера, заснована на продукција на Метрополитен операта што го истражува нивниот однос.