Британската актерка Мили Боби Браун откри дека нејзиниот колега Хенри Кавил поставил „многу строги граници“ во нивната комуникација додека заедно работеле на филмовите „Енола Холмс“ (Enola Holmes) и „Енола Холмс 2“ (Enola Holmes 2).
Имено, 22-годишната ѕвезда од популарната серија „Почудни нешта“ (Stranger Things) за ова зборуваше во интервју за „Дедлајн“ во 2022 година, објаснувајќи дека нејзиниот однос со Кавил бил значително поинаков од оној што го има со колегите од серијата со кои пораснала.
„Поинаку е затоа што пораснав со Ноа Шнап и Чарли Хитон. Ги запознав кога имав 10 години, па за мене тие се како соученици“, објасни таа.
Со Кавил, пак, односот бил значително поформален и попрофесионален.
„Со Хенри се чувствува како вистински однос меѓу возрасни. Како добро и здраво пријателство“, рече актерката.
Браун откри дека Кавил поставил јасни правила кога станува збор за нивната комуникација.
„Хенри има свои правила со мене. Не смеам да го прашувам за неговиот приватен живот. Буквално е: ‘Мили, престани. Не.’ А јас сум како: ‘Разбирам’“, раскажа таа.
Таа додаде дека со колегите од „Почудни нешта“ нема такви граници бидејќи нивниот однос е како меѓу браќа и сестри.
„Но со Хенри е поинаку – тој е многу строг со мене, и искрено го ценам тоа“, истакна Браун.
И самиот Кавил имаше пофални зборови за младата актерка додека го промовираше вториот дел од филмот.
„Јас сум голем обожавател на Мили Боби Браун. Таа е извонредна. Ја следев нејзината работа и можноста да играм во филм што го поддржува нејзиниот лик беше очигледен избор за мене“, изјави актерот.
Браун, која во филмот го игра ликот на Енола Холмс, откри дека работата на оваа франшиза била еден од најважните моменти во нејзината кариера.
„Ова е огромен и пресвртнички момент во мојот живот и кариера. Тоа е првата улога во која навистина го водам филмот“, рече таа.
Третиот дел од франшизата, „Енола Холмс 3“ (Enola Holmes 3), се очекува да пристигне подоцна оваа година. Покрај Браун и Кавил, во филмот повторно ќе се појават Луис Партриџ како Тјуксбери и Хелена Бонам Картер како Еудорија.
Режијата на новото продолжение му е доверена на Филип Барантини, познат по филмовите „Точка на вриење“ (Boiling Point) и „Адолесценција“ (Adolescence).
