Додека ужалените семејства се борат со загубата, се појавуваат нови детали за проблемите со менталното здравје на напаѓачот и неговата историја со полицијата, пишува „USA TODAY“.

Хронологија на нападот

Напаѓачот е идентификуван како 18-годишниот Џеси Ван Рутселар, трансродово лице кое ја започнало транзицијата пред шест години, потврди на прес-конференција Двејн Мекдоналд, заменик-комесар на Кралската канадската полиција. Во вторник, Ван Рутселар прво ги убил својата 39-годишна мајка и 11-годишниот полубрат во својот дом во малата заедница Тамблер Риџ, околу 1.100 километри северно од Ванкувер. Потоа отишол во локалното средно училиште и според полицијата, почнал да пука по случаен избор.

Пет лица биле убиени во училиштето, три 12-годишни девојчиња, едно 12-годишно момче, едно 13-годишно момче и еден 39-годишна наставничка. Мекдоналд појаснил дека пет лица биле убиени во училиштето, а не шест како што првично беше објавено, бидејќи жена која била однесена во болница во критична состојба погрешно била вброена меѓу мртвите.

Кога полицијата пристигнала на местото на настанот во рок од две минути по почетокот на пукањето, Ван Рутселар испукал истрели во нивен правец. Полицајците втрчале во зградата, каде што го пронашле вооружениот напаѓач мртов. Тој извршил самоубиство, а до него биле пронајдени долга цевка и модифициран пиштол.

Напаѓачот претходно ѝ бил познат на полицијата

Мекдоналд изјавил дека полицијата интервенирала во домот на Џеси Ван Рутселар „повеќе пати“ во текот на изминатите неколку години поради загриженост за неговото ментално здравје. Пред неколку години, полицијата запленила огнено оружје од домот и го однела Ван Рутселар во болница на медицинска процена според Канадскиот закон за ментално здравје. Мекдоналд рекол дека полицијата последен пат го посетила домот минатата година и не знаат дали Ван Рутселар активно добивал помош за неговите проблеми со менталното здравје.

Во врска со конфискацијата на оружјето, тој објаснил дека „подоцна, законскиот сопственик побарал враќање на тоа оружје, што било одобрено“. Тој додал дека на името на напаѓачот не е регистрирано огнено оружје.

Мотивот на нападот сè уште е непознат

Според Мекдоналд, во моментов нема информации што би укажувале дека Ван Рутселар бил жртва на злоупотреба. Тој се отпишал од средното училиште Тамблер Риџ пред четири години, но не е јасно зошто. Истражителите не пронашле проштално писмо што би фрлило светлина врз мотивите зад нападот и веруваат дека тој конкретно не целел никого во училиштето. Тие исто така веруваат дека тој дејствувал сам.

„Во овој момент, немаме сознанија за мотивот. Тоа е нешто што го истражуваме опширно, но би било прерано да се шпекулира за мотивот во овој момент“, истакнал Мекдоналд.

Вознемирувачка интернет историја

Центарот за екстремизам на Лигата против клевета (АДЛ) соопшти дека нивните прелиминарни наоди покажале дека Ван Рутселар „следел вознемирувачки модел на онлајн радикализација“. Неговата онлајн активност „се карактеризирала со интерес за идеологијата на белата супремација и самопрогласена зависност од морбидна содржина“.

АДЛ соопшти дека тој имал „обемна дигитална трага на различни платформи“, вклучувајќи страница каде што корисниците можат да гледаат снимки од обезглавувања, тортура, силување и погубувања. Во извештај објавен минатата година, АДЛ предупреди дека двајца неодамнешни масовни убијци имале профили на таа страница и „сè повеќе се приклонувале на екстремистички идеологии, вклучително и усвојување на ставови на белата супремација“.

Како што рекле страницата, „служи како виртуелен простор каде што корисниците, особено младите луѓе, можат да пристапат до екстремистичка содржина со графичко насилство, што потенцијално ги десензибилизира и го зголемува нивниот ризик од идеолошки мотивирано насилство“.

Мајката ги поддржувала трансродовите права и поседувањето оружје

На својот Инстаграм профил во јули 2024 година, мајката на напаѓачот објавила дека ја поддржува заштитата на трансродовите деца и ги критикувала „интернет воините“. „Како конзервативна либертаријанка која живее на север и го сака животот во малите градови, навистина се надевам дека омразата што ја гледам онлајн е само производ на здодевноста на старите луѓе, а не вистинска омраза. Бидете подобри и едуцирајте се“, напишала таа.

На својот Фејсбук профил објавувала и за поседувањето оружје. Еднаш како своја профилна слика ставила фотографија од шест пушки со коментар: „Мислам дека е време да ги изнесам на вежби со гаѓање“. Во објава од јули 2021 година, таа побарала од следбениците да го погледнат Јутјуб каналот на нејзиниот син Џеси. „Тој објавува за лов, одржливост, оружје и работите што сака да ги прави. Тоа е неговиот начин на споделување на својот живот“, напишала таа, а Јутјуб вчера го отстрани каналот поради кршење на неговите упатства за заедницата.

Заедницата е во шок

Истражителите ги испитуваат сите аспекти на случајот, вклучително и како Ван Рутселар го добил оружјето и покрај неговите проблеми со менталното здравје. Додека семејствата тагуваат за своите најблиски, две од жртвите од пукањето се во критична состојба и се борат за живот, рекол Мекдоналд.

Заедницата Тамблер Риџ, која брои околу 2.400 жители е потресена и се обидува да им пружи поддршка на погодените. Пред училиштето, на чијшто прозорец може да се види знаме со бои на виножито со порака „Сите се добредојдени тука“ биле оставени букети и кадифени играчки.

„Ќе ги познавам сите жртви, ние сме мала заедница“, изјавил градоначалникот на Тамблер Риџ, Дарил Краковка за „CBC News“. „Не ги нарекувам жители, ги нарекувам семејство“, додал тој.