Во меѓувреме, повеќе пати бил кривично гонет. Надлежната државна канцеларија сепак продолжува да му исплаќа пари.

„Како е тоа можно?“ прашува најтиражниот германски весник Bild“, кој пишува за, како го нарекуваат, „криминалниот Босанец“, пренесува „Deutsche Welle“.

Случајот на Хусо Б.

Хусо Б. првпат се појавува во Келн во 2003 година и бара азил. Босанецот, кој потекнува од ромско семејство, нема никакви лични документи. Неговото барање за азил е брзо одбиено: Босна и Херцеговина се смета за безбедна земја на потекло. Хусо Б. потоа исчезнува – и во 2007 година повторно се појавува во Германија, пренесува „Bild“.

Повторно е протеран, но повторно успева да остане во Германија бидејќи ангажира адвокат и поднесува тужба во врска со правото на престој. Постапката се протега две години, а потоа неговото барање повторно е одбиено. И повторно никој не го депортира, дури ни кога ќе изврши кривични дела, забележува „Jutarnji list“.

„Bild“ пишува и дека Хусо Б. полицијата го познава поради разни измами.

„Но, тој не се посветува само на својата криминална кариера. Овој Босанец во Келн основал семејство и со сопругата има вкупно осум деца. И прима помош од државата според Законот за надоместоци за азиланти: по 835,24 евра „помош за животни потреби“ за него и неговата сопруга, и помеѓу 630,81 и 817,71 евра по дете, во зависност од возраста. Тоа вкупно изнесува над 87.000 евра годишно. Семејството инаку не плаќа кирија, бидејќи живее во руиниран блок за азиланти во Келн. За споредба, просечното семејство во Германија располага, според Федералниот завод за статистика, со нето приход од 4.496 евра. За осумте деца се додаваат 2.072 евра детски додаток, што вкупно изнесува 6.568 евра месечно“, пишува германскиот таблоид.

Депортацијата не се спроведува поради децата

Градот Келн поради заштита на податоците не сака да се изјасни за овој случај. Тие наведуваат дека „во случај на недостаток на право на престој, обврската за напуштање на земјата не може секогаш да се спроведе. Тука мора да се земат предвид, меѓу другото, и семејните околности. Велат дека, ако децата би биле погодени од депортација – дури и само индиректно – тоа мора да се земе посебно предвид.“

Значи, депортацијата на Хусо Б. не се спроведува поради децата. Имајќи предвид дека семејството одамна живее во Германија, тие веќе не примаат само основна помош за азиланти, туку и таканаречени „зголемени аналогни надоместоци“, во висина на редовната социјална помош. Според податоците на градот Келн, само во оваа метропола на Рајна има седум семејства од по десет членови со малолетни деца, кои примаат надоместоци за азиланти.

Што вели Хусо Б. за сето тоа?

„BILD“ има увид во документи кои покажуваат колку Хусо Б. и неговото семејство добиваат пари од државата. Кога новинарите во неговиот дом во Келн го соочиле со оваа фактичка состојба, тој сепак негирал дека прима толку пари.

Тој исто така изјавил дека „последното кривично дело што го извршил било во 2014 година“.

Хусо Б. последен пат требало да се појави пред суд на 8 декември 2025 година. Тој е обвинет дека се обидел да изврши измама во една дрогерија со поклон-картички. Судскиот процес на крај бил одложен за оваа година, пишува германскиот весник „Bild“, пренесува „Deutsche Welle“.