Кога се зборува за екстремни зими и огромни количини снег, повеќето луѓе најпрво помислуваат на Канада, Русија или Скандинавија.
Сепак, според метеоролошките податоци и долгогодишните статистики, титулата за најснежна земја во светот всушност ја носи Јапонија.
Податоците на „AccuWeather“ покажуваат дека дури три јапонски града со повеќе од 100.000 жители се на самиот врв на листата на места со најголема количина годишни снежни врнежи. Она што дополнително изненадува е фактот дека Јапонија во тој поглед значително ги надминува земјите кои традиционално се поврзуваат со сурови зими.
Градот Аомори, сместен на северот на најголемиот јапонски остров Хоншу, важи за град со најмногу снег во светот. Во просек, во текот на една година, во овој град паѓаат околу 7,9 метри снег. Од ноември па сè до април, улиците на Аомори се прекриени со дебели слоеви снег, додека високите снежни ѕидови покрај тротоарите дополнително се зголемуваат со секое поминување на ралниците што ги чистат сообраќајниците.
Слична борба со снегот води и Сапоро, најголемиот град на островот Хокаидо. Таму годишно, во просек, паѓа околу 4,85 метри снег. Токму благодарение на таквите зимски услови, Сапоро е домаќин на прочуениот фестивал Јуки Мацури, за време на кој секоја година се изложуваат импресивни и монументални скулптури од снег и мраз, кои привлекуваат милиони посетители од целиот свет.
Големи количини снег се бележат и во градот Тојама, на брегот на Јапонското Море, каде просечната годишна количина на снежни врнежи изнесува околу 3,6 метри.
Метеоролозите објаснуваат дека причината за ваквите екстремни зимски услови е единствена комбинација од географија и клима. Во текот на зимата, студениот воздух од Сибир се движи кон исток и минува над Јапонското Море. Бидејќи морето е потопло од воздухот, доаѓа до интензивно испарување и создавање густи облаци. Кога тие облаци ќе наидат на планинските масиви во внатрешноста на Јапонија, воздухот нагло се лади, влагата се кондензира и се претвора во обилни снежни врнежи. Во такви услови снегот може да паѓа непрекинато со денови.
Јапонија држи и светски рекорд кога станува збор за висината на снежната покривка. На планината Ибуки во февруари 1927 година биле измерени дури 11,82 метри снег. Тој рекорд, речиси неверојатен според денешните стандарди, не е надминат веќе речиси сто години.
Поради ваквите природни услови, снегот во Јапонија не е само сезонска појава, туку составен дел од секојдневниот живот, инфраструктурата и културата, особено во северните и планинските делови на земјата.
