Во народното верување постои ден кој се смета за особено важен кога станува збор за долговите и обврските.
Според традицијата, токму денес треба да се заврши сè што им должите на другите – било да станува збор за пари, позајмени работи или неисполнети ветувања. Се верува дека оние кои тоа нема да го направат ќе влезат во новата година оптоварени со старите проблеми, кои потоа продолжуваат од месец во месец.
Овој обичај се поврзува со Туцинден, денот кој се одбележува во пресрет на Божиќ според јулијанскиот календар. Се смета дека во празниците не треба да се влегува со долгови, бидејќи тие симболично носат немаштија и финансиска нестабилност во текот на целата година.
Покрај подготовките за Божиќ и семејните собирања, Туцинден во народот бил и ден за „расчистување на сметките“. Луѓето се труделе да го вратат позајменото, да ги исплатат старите обврски и да не му останат должни на никого, за празниците да ги пречекаат растеретени и во мир.
Верувањето исто така вели дека тој ден не треба ништо да се дава од куќата, бидејќи се смета дека заедно со работите се изнесува и среќата од домот. Затоа се советува претпазливост и чување на она што веќе го имате.
