Државниот секретар на САД, Марко Рубио, рече дека денешните состаноци биле „најпродуктивните и најзначајните состаноци во досегашниот процес“. Сепак, тој истакна дека сè уште има многу работа што треба да се направи.

„Имаме многу добар работен производ кој веќе е изграден врз основа на придонесот на сите релевантни страни вклучени овде, и сега можевме да разгледаме некои од тие ставки, точка по точка. И мислам дека постигнавме добар напредок.

Нашите тимови сега заминаа во своите соби додека работиме на некои од предлозите што нѝ беа понудени. Значи, работиме на тоа, правиме некои промени со надеж дека дополнително ќе ги намалиме разликите и ќе се приближиме кон нешто со што и Украина и очигледно САД се многу задоволни“, рече Рубио.

Јермак: Се движиме кон праведен и траен мир

Зборувајќи по Рубио, шефот на кабинетот на украинскиот претседател, Андриј Јермак рече дека денешните состаноци биле „многу продуктивни“:

„Постигнавме многу добар напредок и се движиме кон праведен и траен мир. Украинскиот народ го заслужува и го посакува овој мир повеќе од кој било друг“, нагласи тој. Тој им се заблагодари на „големите пријатели“, САД и Доналд Трамп.

Но, како и шефот на дипломатијата на САД, тој истакна дека работата на мировниот план ќе продолжи и најави дека Украина „ќе ги ангажира и своите европски пријатели“.

Ниту Марко Рубио, ниту Андриј Јермак не одговараа на прашања за време на нивниот краток брифинг пред малку.

Рубио изјави дека разговорите се „тековен процес“ и дека ќе се вратат „подоцна вечерва“ и можеби тогаш ќе можат да одговорат на прашања, додавајќи: „Ајде да се вратиме на работа“.