Наместо тоа, смета Гејтс, светските филантропи треба повеќе да инвестираат во борба против болести и глад, пренесува „CNN“.

„Климатските промени нема да го уништат човештвото“

Гејтс напиша дека климатските промени нема да доведат до крај на човештвото, додавајќи дека досегашните напори за постигнување нулта емисија на јаглерод веќе дале реален напредок.

Сепак, според него, многу досегашни инвестиции во оваа област биле погрешно насочени, а огромни суми биле потрошени на скапи и сомнителни проекти.

„Подобрувањето на животот е поважно од емисиите на јаглерод и промената на температурата“, наведува Гејтс, истакнувајќи дека инвестициите во борбата против климатските промени треба да продолжат, но дека ресурсите мора да се распределат поефикасно.

Тој предупреди дека кратењата во финансирањето на агенцијата „USAID“, кои ги спровела администрацијата на Доналд Трамп, создаваат нови глобални проблеми, односно ја загрозуваат борбата против гладот и болестите кои можат да се спречат.

„Климатските промени, болестите и сиромаштијата се големи проблеми. Треба да се справуваме со нив во согласност со степенот на страдање што го предизвикуваат“, пишува Гејтс.

Според него, промените во американското финансирање на овие програми бараат итно пренасочување на инвестициите и ресурсите кон помош на најзагрозените подрачја.

„Иако климатските промени ќе имаат сериозни последици, особено за луѓето во најсиромашните земји, тие нема да доведат до исчезнување на човештвото. Ова е прилика повторно да се фокусираме на показател кој е поважен од емисиите и температурата — подобрување на животот“, наведува Гејтс.

„Нашата главна цел треба да биде спречување на страдање, особено меѓу луѓето кои живеат во најтешки услови и најсиромашните делови од светот“, додаде тој.

Есејот на Гејтс, кој предизвика изненадување низ светот, беше објавен во пресрет на „COP30“ — глобалниот самит за борба против климатските промени, кој ќе се одржи следниот месец.

Одрекување од тврдењата дека го сменил ставот

Администрацијата на Доналд Трамп ја укина „USAID“, меѓународната агенција за помош што секоја година обезбедуваше околу 8 милијарди долари во храна и лекови за земји во развој.

Гејтс ги отфрли тврдењата дека неговата нова изјава претставува промена на мислењето во однос на претходните години.

Во есејот напомена дека светот и понатаму мора да ги поддржува напорите за постигнување нулта емисија на јаглерод, но дека фокусот мора да биде поширок и поурамнотежен.

Сепак, во интервју за „CNBC“ со Ендрју Рос Соркин, објавено истиот ден, Гејтс призна дека повлекувањето на дел од инвестициите од борбата против климатските промени е неопходен и реален потег.

Овој пресврт претставува јасно отстапување од неговите досегашни филантропски приоритети, кои опфаќаа инвестирање во компании за чиста енергија и лобистички иницијативи.

Во претходниот есеј од 2023 година објавен на страницата „Breakthrough Energy“, кој подоцна беше отстранет, Гејтс напиша дека „поголемиот дел од луѓето во светот се борат со последиците од климатските промени“, чувство кое, како што вели, може да биде „обесхрабрувачко“ и бара „одговор без преседан“ по обем и брзина.

Со најновиот став, Гејтс го пренасочува фокусот — од апокалиптичните сценарија кон практични решенија што директно го подобруваат човечкиот живот.