Полицијата ја започнала истрагата откако агенти забележале сомнителни огласи за продажба на егзотични животни на социјалните мрежи. Меѓу понудените видови имало азиски видри, дикобрази, меркати и кенгури – доволна причина да се подигне аларм.

Со понатамошна истрага биле откриени и видеоснимки на кои еден од одгледувачите се појавува со леопарди и бувови, што уште повеќе ги потврдило размерите на нелегалните активности. На агентите им станало јасно дека не станува збор за изолиран случај, туку за организиран потфат.

По прибирањето докази, припадници на шпанската „Guardia Civil“ извршиле претреси на неколку парцели и складишта поврзани со осомничените. Откриле дека двајцата мажи, на возраст од 30 и 35 години, немале никакви дозволи – ниту за одгледување ниту за управување со зоолошки парк.

Импресивен, но нелегален список

Запленетите животни вклучувале зебра, два тукана, два сервали, шест тури (говеда), три монгуси , камила, пет бувови, три папагали макао – од кои два биле пријавени како украдени – како и многу други видови, меѓу кои агутии, кинкажу и дикобрази.

Истражителите посочиле дека осомничените животните ги чувале делумно од хоби, но и со јасна намера за продажба. Трговската вредност на сите запленети животни е проценета на повеќе од 70.000 евра.

Иако животните биле сместени во кафези, утврдено е дека биле во добра состојба и „добро згрижени“. Сепак, ниту едно од нив не било официјално регистрирано – што претставува клучен прекршок при поседување заштитени видови.

Судска постапка и понатамошни мерки

Против двајцата мажи е покрената постапка за трговија со заштитени животни и шверцување, а случајот ќе го води судот во Нулес. Полковникот Мартинез Рос од командата на „Guardia Civil“ во Валенсија нагласил дека во овој нелегален центар биле пронајдени не само заштитени, туку и други видови со различни степени на заштита.

Животните официјално се запленети, но привремено ќе останат под надзор на сопствениците додека не се организира нивен трансфер во овластени зоолошки паркови и центри за заштита на животни низ целата земја.