Во сложениот простор на тројниот ѕвезден систем „Алфа Кентаури“, телескопот „JWST“ откри присуство на џиновска егзопланета што кружи околу „Алфа Кентаури А“, најсличната на Сонцето од трите ѕвезди.

Она што е уште поважно – таа егзопланета се наоѓа во населивата зона на ѕвездата, на совршено растојание за создавање течна вода.

Доказите за овој потенцијален свет, кој засега е познат како „Алфа Кентаури Аб“, се добиени преку директно снимање – значаен пробив во науката за егзопланети.

„Ако се потврди, потенцијалната планета забележана на снимките од „Веб“ би означила нова пресвртница во истражувањето на егзопланети. Од сите директно снименi планети, оваа би била најблиску до својата ѕвезда. Таа исто така е најслична по температура и старост на џиновските планети во нашиот Сончев систем, а воедно е и најблиска до нашиот дом, Земјата – вели астрофизичарката Аникет Санги од Калифорнискиот технолошки институт.

Алфа Кентаури – најблискиот сосед на Земјата

Системот „Алфа Кентаури“ се наоѓа на само четири светлосни години од нас и е составен од бинарниот пар „Алфа Кентаури А“ и „Алфа Кентаури Б“, околу кои на поголема оддалеченост кружи црвената џуџеста ѕвезда „Проксима Кентаури“.

Веќе се познати неколку егзопланети во овој систем. Три планети се откриени околу „Проксима Кентаури“, вклучувајќи и една во населивата зона. Но условите околу црвените џуџиња, кои често се бурни, може да бидат далеку помалку погодни од оние околу ѕвезди како Сонцето.

Детекцијата на светови во централниот бинарен систем била многу потешка.

„Со оглед на тоа што овој систем ни е толку близок, секоја пронајдена егзопланета би ни овозможила најдобра можност да собереме податоци за планетарни системи што не се наши – вели астрономот Чарлс Бајхман, директор на Институтот за наука за егзопланети на „NASA“ при „Калтех“. Тој додава дека овие набљудувања се неверојатно предизвикувачки, дури и со најмоќниот вселенски телескоп на светот, бидејќи овие ѕвезди се многу светли, блиски и брзо се движат по небото.

Први навестувања и следните чекори

Досега, „Алфа Кентаури Б“ останува без потврден свет. Сепак, навестувања на нешто беа забележани во орбитата околу „Алфа Кентаури А“, најсјајната од трите ѕвезди и единствена со ист G-тип како Сонцето, пренесува „Science Alert“.

Во 2021 година, тим астрономи предводен од Кевин Вагнер од Универзитетот во Аризона објави прелиминарно откритие на егзопланета во населивата зона на „Алфа Кентаури А“, идентификувана исто така преку директно снимање.