По крајбрежјето, најтрофејниот тенисер во светот, Новак Ѓоковиќ, пристигнал на една од своите омилени дестинации – планината Дурмитор во Црна Гора.
Неговата долгогодишна љубов кон овој дел од Црна Гора не е тајна, а ниту овој пат тој не помина незабележано. Жителите на Жабљак не го криеја своето задоволство што, како што велат, најголемиот шампион на сите времиња повторно е меѓу нив.
„Го видовме во ресторанот „Оро“ во центарот на Жабљак. Како и секогаш кога го гледаме на телевизија, таков беше и во живо – љубезен, насмеан, полн со почит. Не му беше тешко да се фотографира со обожавателите и да дава автограми. Тој човек е навистина жива легенда“, изјави еден од мештаните за РИНА.
Атмосферата во ресторанот била опуштена, а Ѓоковиќ уште еднаш покажал дека покрај светските титули, тој е првенствено човек од народот, скромен и со многу манири.
Новак престојувал на Дурмитор и во претходните години, а со своето семејство времето го поминувал посетувајќи фасцинантни предели, планински езера и јавајќи коњи.
Инаку, страницата „Beautiful destinations“, која има околу 25 милиони следбеници на Инстаграм, објави листа од седум национални паркови што треба да се посетат ширум целиот свет, а меѓу нив се најде и Дурмитор.
Дурмитор е планина во Црна Гора, а највисокиот врв е Боботов Кук, висок 2.523 метри. Заедно со околината прогласен е за Национален парк во 1952 година. Паркот го опфаќа главниот масив Дурмитор со кањоните Тара, Драга и Сушице и горниот дел од долината на кањонот Комарница, зафаќајќи површина од 39.000 хектари.
„Се верува дека името Дурмитор потекнува од келтските зборови „дру ми торе“, што значи вода под камен. За величественоста на пејзажот, покрај убавината на планинските езера и блескавата водна површина, придонесуваат и шумскиот предел што го окружува, и врвот Меѓеда, кој величествено се издига над него. Шумите зафаќаат релативно мала површина, но некои од нив се вистински реткости на природата, како што е шумата од црн бор во месноста Црна пода, чии грандиозни дрвја високи до 50 метри успеале да издржат различни временски услови цели 450 години“, велат од ТО Жабљак.
Во последниве години, овој национален парк станува сè попопуларен меѓу странските туристи, особено во летните месеци, кои се сметаат за врв на туристичката сезона.
