Во документите поднесени на 30 јули во окружниот суд во Лос Анџелес, Боуман изјавила дека била „шокирана и преплашена“ од својот сопруг и дека го пријавила инцидентот откако добила СМС-порака од непозната девојка со докази за наводната сексуално експлицитна преписка на Маден.

Тој реагирал бурно откако таа му го земала телефонот

Според судските документи, физичкиот напад се случил на 21 јули, кога Боуман го соочила Маден со пораките. Таа тврди дека тој не ѝ го дал телефонот и почнал да ја брише содржината, па таа го зела телефонот и истрчала од куќата.

„Ме зграпчи за половината и рацете за да ме запре. Ме фрли на мермерната кујнска плоча. Почувствував болка во колковите и половината. Ме турна на подот, бев на колена. Ми викаше да му го вратам телефонот. Беше полуден. Никогаш не сум го видела таков – како сосема друга личност“, се вели во изјавата на Боуман, според „Пипл“.

Судот веќе изрече привремена забрана за приближување, а рочиштето е закажано за 20 август. Наредбата важи и за нивните две кучиња, Тост и Џем. Двојката нема деца.

Тој, исто така ја нападнал во мај

Во документите, исто така, се наведува дека друг инцидент се случил во мај, кога Маден наводно предизвикал емоционална и физичка повреда на својата сопруга. Во приложените пораки, Маден го опишува своето однесување како „приватна и лажна безопасна фантазија“ што нема никаква врска со реалниот живот.

Во една порака, Боуман напишала:

„Не познавам човек кој вработува 18-годишни проститутки и им пишува дека сака да им биде очув и да ги силува додека сме на меден месец“.

Маден одговорил: „Неверојатно ми е жал за моите постапки, но морам да кажам дека сè друго е само во пораките. Тоа не е изговор, но никогаш не би дејствувал врз основа на тие „фантазии“.

Уапсен неколку пати

Мики Маден го напушти „Марун 5“ во 2020 година, кратко откако беше уапсен под обвинение за семејно насилство. Тој беше ослободен истата година со кауција од 50.000 долари. Претходно беше уапсен во 2016 година за поседување кокаин, но се согласи на еднодневна наредба за општествено корисна работа.

Маден моментално е на рехабилитација, а неговиот претставник не бил веднаш достапен за коментар.