Во време кога сексот е сеприсутна тема – од филмови и серии до социјални мрежи – сè уште постои простор за нови прашања, идеи и искуства. Еден од концептите што влегува во сè повеќе разговори за интимноста, особено меѓу генерациите кои ја поминале фазата на физичка експлозија на хормони, е – менталниот оргазам. Но, што точно е тоа – и дали е навистина „секс без допир“?

Менталниот оргазам не е научна класификација, туку термин што луѓето сè повеќе го користат за да опишат интензивно чувство на задоволство, поврзаност и возбуда што доаѓа одвнатре – поттикнато од зборови, погледи, мисловни игри и емоционална синергија. За некои, тоа е моментот кога вашиот партнер ве „погодува“ точно таму каде што ви треба – не со раце, туку со разбирање, хумор или една единствена, совршено изговорена реченица.

За разлика од физичкиот секс, каде што телото ја презема водечката улога, овде умот ја презема контролата – а задоволството може да биде подеднакво моќно. Не без причина се вели дека мозокот е најголемиот сексуален орган. Похота, привлечност, фантазии – сè започнува во главата. Ментален оргазам се случува кога некој ја активира вашата имагинација, интелигенција или емоционална ранливост на начин кој длабоко ве погодува.

Тоа може да биде:

• Интензивен разговор што води до емоционално изложување;

• Длабока интелектуална поврзаност;

• Флерт кој користи двосмислени пораки, предизвици и ментални игри;

• Глас, тон, начин на зборување што ве тера да се наежите.

Иако ова почесто се дискутира меѓу жените, сè повеќе мажи признаваат дека сексот кој вклучува ментална стимулација – како што се длабоки разговори, интелектуално предизвикувачко поврзување или емоционална блискост – им дава подеднакво интензивни, ако не и подлабоки, чувства на задоволство.

Паровите кои се заедно долго време често велат дека повеќе не се возбудени од самата физичка страст, туку од она што се случува претходно – начинот на кој се гледаат еден со друг, како знаат како да се „прочитаат“ еден со друг, како си кажуваат зборови за кои знаат дека ќе го погодат вистинското место.

Зошто е важно да се зборува за менталниот секс?

Затоа што нè потсетува дека сексуалноста е многу поширока и подлабока од самата физичка природа. И затоа што отвора врата за конекција која ќе биде потрајна, побезбедна, а понекогаш дури и поинтензивна од самиот физички однос. Во општество кое често фаворизира брза, површна стимулација, менталниот оргазам нуди нешто поинакво – побавно, посуптилно, но неверојатно моќно.

Како да се „постигне“?

Не постои универзален рецепт, но постојат начини да се направи простор за ваков вид поврзаност:

• Не плашете се да зборувате за желби, фетиши, граници и фантазии;

• Инвестирајте во емоционална блискост, слушајте се еден со друг без осудување;

• Воведете интелектуално флертување – разменувајте мисловни предизвици, двојни толкувања, па дури и филозофски прашања;

• Практикувајте „бавност“ – во разговорот, погледот, допирот;

• Негувајте чувство на сигурност, доверба и разбирање.

Менталниот оргазам не е мит, туку вистинско искуство кое ни кажува дека вистинската поврзаност не секогаш мора да биде физичка. Во ерата на брзина, инстант-дејтовите и експлицитност, сè повеќе луѓе бараат подлабока поврзаност – таква што се чувствува во секој дел од телото, а започнува и завршува во главата.

Бидејќи понекогаш најинтимното нешто што можете да му го дадете некому е – вашата мисла.