Локалните власти велат дека ова е еден од најсмртоносните напади на руската војска врз цели во Украина во 2025 година, пренесува „CNN“.

Нападот на родниот град на претседателот Зеленски, предизвикал пожари, а оштетени се и бројни станбени згради. Новинската агенција Укринформ извести дека биле погодени 20 станбени згради, а биле оштетени повеќе од 30 возила.

Серхиј Лисак, шеф на воената администрација на регионот Дњепропетровск, изјавил дека по нападот во болниците биле згрижени повеќе од 30 лица, меѓу кои и тригодишно дете.

Во нападот биле повредени вкупно 61 лице, меѓу кои 12 деца. Четириесет лица се во болници, а останатите добиваат медицинска помош во своите домови

„Ова е вид на страдање што не би му го посакале ниту вашиот најголем непријател“, напишал Лисак на Телеграм.

„Сите руски ветувања завршуваат со ракети, беспилотни летала, бомби и артилерија“, изјавил претседателот Зеленски по нападот. „Дипломатијата не им значи ништо“, додал тој.

Министерството за одбрана на Руската Федерација тврди дека целта бил воен собир во Крив Рих. Оттаму рекоа дека на местото на нападот биле „украински команданти и инструктори од Запад“ и дека 85 од нив биле убиени.

Украинската војска го отфрли ова тврдење како „лажна информација“

„Ракетата погоди станбена зона со детско игралиште“, соопшти Главниот штаб на вооружените сили на Украина. Исто така тие кажаа дека Крив Рих бил погоден со балистичка ракета „Искандер-М“.

„Ракетата експлодирала во воздух за да повреди што е можно повеќе луѓе“, изјавил директорот на воената управа во градот, Олександр Вилкул.

Вилкул додал дека, по ракетниот напад, Русите извршиле и напад со беспилотни летала, чија цел биле цивилни домови.

По тие напади избувнале четири пожари. Вилкул рекол дека во нападот била убиена 56-годишна жена која во тој момент била во нејзиниот дом, а пет лица биле повредни.

Дрон од типот „шахед“ удрил во куќата на убиена жена.

Пожарникарите изгаснале неколку пожари, а во бомбардирањето биле оштетени пет згради, објави на Телеграм министерот за внатрешни работи Игор Клименко.

Русите тврдат: Во нападот во Крив Рог бил погоден објект со странски инструктори

Руските војници извршиле високопрецизен ракетен напад на местото на средба на командантите на вооружените сили на Украина и западните инструктори во еден од рестораните во Крив Рог, соопшти руското министерство за одбрана.

„На 4 април, во 18:49 часот, на местото на средбата на командантите на формациите и западните инструктори во еден од рестораните во градот Крив Рог била лансирана високопрецизна ракета со високо експлозивна муниција“, соопштија од министерството.

Според податоците, загубите на вооружените сили на Украина изнесувале до 85 воени лица и офицери на странски земји, како и до 20 единици автомобилска опрема.

Како одговор на нападите на вооружените сили на Украина врз цивилни цели, руските војници редовно ги напаѓаат локациите на персоналот, опремата и платениците, како и инфраструктурата на Украина – одбранбената индустрија, воената команда и комуникациските објекти, пренесе РИА Новости.

Истовремено, портпаролот на Кремљ, Дмитриј Песков, постојано нагласува дека армијата не напаѓа станбени згради и социјални институции.