Средината на декември, цената на акцијата на "Tesla" се приближи до 500 долари, по што следуваше голем пад, кој кулминираше во понеделникот кога цената на една акција падна на само 222 долари. Додека пазарната вредност на Тесла на 17 декември изнесуваше 1,5 билиони долари, сега е помала од 780 милијарди, а ќе биде интересно да се види како ќе се движи оваа вредност во иднина, бидејќи интересот за електричните автомобили на Маск опаѓа на многу пазари.

Со големиот пад на пазарната вредност на "Tesla", значително се намали и богатството на нејзиниот најголем акционер Маск. Но, и покрај загубата од над 100 милијарди долари, тој и понатаму останува најбогатиот човек во светот, со нето богатство од над 300 милијарди долари.

Голем интерес за "xAI" и "SpaceX"

Додека "Tesla" тоне, Маск може да биде задоволен со вредноста на неговите други компании, кои сè уште се приватни, односно нивните акции не се листани на берза. Станува збор за "SpaceX", "xAI", "Neuralink" и "The Boring Company". Вредноста на овие четири компании на секундарниот пазар – базирана на инвестициите од инвеститорите од претседателските избори во САД на 5 ноември – пораснала за дури 45%, според анализата на платформата за тргување со акции "Caplight".

На секундарниот пазар, инвеститорите купуваат удели во приватни компании, најчесто од вработени или рани инвеститори. Проценетата цена на овие удели повеќе го одразува чувството и довербата на инвеститорите во бизнисот, отколку самите деловни перформанси.

Најголем раст на вредноста постигна најмладата компанија на Маск – "xAI", која за неколку месеци ја удвои својата вредност. Според прогнозите на "Caplight", таа сега изнесува 96 милијарди долари и се очекува наскоро да ја надмине границата од 100 милијарди. Ова е фантастичен успех за компанија која до пред неколку години воопшто не постоеше.

Голема побарувачка има и за удели во "SpaceX", чија вредност исто така двојно порасна од изборот на Трамп за претседател на САД.

"Neuralink" со стабилен раст, "The Boring Company" во минус

Вредноста на "Neuralink" исто така значително порасна – за една четвртина од 5 ноември, достигнувајќи 9,32 милијарди долари. Средината на 2023 година, оваа компанија беше проценета на околу 5 милијарди долари. Овој пораст покажува ентузијазам меѓу инвеститорите околу напредокот на компанијата во развојот на технологијата за поврзување на компјутерите со човечкиот мозок. По успешните тестирања врз луѓе, се очекува вредноста на "Neuralink" да продолжи да расте.

Сепак, не сите компании на Маск се во плус. Вредноста на компанијата за ископување тунели "The Boring Company", по изборите, паднала за нешто помалку од 8%.

Интересно е што анализата на "Caplight" не ја опфаќа социјалната мрежа "X", бидејќи, според извршниот директор на компанијата Хавиер Авалос, побарувачката за удели на секундарниот пазар е исклучително ограничена.